I Lo Hre Tawh Em?
Hmân laiah tuemawin mi lovah buh lem a theh tih chu a rin tlâk em?
Emperor Justinian-a ziak Digest lehkhabu, a copy kum 1468-a siam hi hmân lai dân thute chipchiar taka sawina lehkha pawimawhte zînga pakhat a ni
MATTHAIA 13:24-26-ah Isua’n: “Vân ram chu, mi a lova chi ṭha thehtu nên chuan tehkhin a ni, nimahsela mi an muthilh hlânin a hmêlhma a lo kal a, buh zingah chuan buh lem a theh a, a kal bo leh ta a. Tin, buh chu a lo ṭo va a lo vuih chuan buh lem chu a lo lang ve ta a,” tiin a sawi a. Lehkha ziaktu ṭhenkhat chuan he thehkhin thu hi thilthleng tak tak a nih an ringhlel a; mahse, hmân lai Rom dân lehkhaziakte chuan hetiang thil hi a thleng tak tak thei tih a sawi.
Bible dictionary pakhat chuan Rom dân hnuaiah, phuba lâk duh vânga mi lova buh lem theh chu sual a ni tih a sawi a. Dân awm a ngaih chhan chu he thil hi a thlen tak tak vâng a ni. Dân lama mi thiam Alastair Kerr-a chuan Isua thih hnu kum 533 khân, Rom Emperor Justinian-a chuan ama ziak Digest tih lehkhabu a tihchhuah thu a sawi. Chu chu Rom dân khai khâwmna a ni a, chutah chuan Isua thih hnu kum 100-250 vêla dân chungchânga mithiamte thusawi lâkchhâwn pawh a tel a ni. Digest lehkhabu sawi dânin, chûng mithiamte zînga pakhat Ulpian-a chuan kum zabi hnih laia thubuai pakhat chungchâng a sawi a. Mi dang lova buh lem thehna chuan buh ṭhate chu a tichhia a. Chutianga buh tih chhiatsak tâwktu lo neitu pa chuan dân ang takin a buh tichhetu lakah zângnadawmna a dawng thei tih Digest lehkhabu chuan a sawi.
Chutiang thilte chu hmân lai Rom Empire hunah a thleng a, chu chuan Isua tehkhin thu hi thilthleng dik tak a ni tih a târ lang a ni. (ws16.10-E)