Boruak Nuam Tak Siam Rawh

Mi mala inzirna chu hlâwkpui lehzual i duh em? Hêng thurâwnte hian inzirna i neih huna ṭha lehzuala rilru pe thei tûrin a ṭanpui ang che:

• Hmun nuam tak thlang rawh. A theih chuan, hmun fai leh êng ṭha tak thlang ang che. Dawhkâna inzirna neih i thlang thei a, a nih loh leh pâwn lama hmun nuam tak i thlang thei a ni.

• A fâla i awm theihna tûr thlang rawh. Isua chuan ṭawngṭaina atân ‘khawvâr hma’ leh “hmun fianrial” a thlang a. (Mk. 1:35, NWT) A fâla awm a theih loh a nih pawhin i chhûngte, a nih loh leh i chênpuite chu inzirna i neih hun tûr hriattîr la, a theih phawt chuan i neih chhûnga rilru la pêng thei thilte ti lo tûrin hriattîr ang che.

• Rilru pe tlat rawh. Rilru la pêng thei thilte pumpelh rawh. Phone, a nih loh leh tablet hmanga inzirna i nei a nih chuan tibuai lo tûr chein a ri lo tûrin emaw, airplane mode-ah emaw i dah thei a. Inzirna i neih chhûngin thil tih ngai eng emaw i hre chhuak a nih chuan a hnua tih atân i ziak chhuak thei bawk a. Rilru pêk reng harsa i tih chuan châwl lawkin i kal kual vêl thei a, a nih loh leh i inzimar thei a ni.