Chhiartute Zawhna

Isua’n Lalpa Zanriah a hmêlhriattîr lai khân, thu hril tûra a tirh chhuah zirtîr 70-te kha khawiah nge an awm? Ani chu an kalsan em ni?

Isua’n Lalpa Zanriah a hmêlhriattîr laia zirtîr 70-te a bula an awm loh avâng maiin anni chu Isua’n a pawm lo emaw, anni chuan an kalsan emaw angin kan ngai tûr a ni lo. Isua’n chu hun chu a tirhkohte nên chauhva hman a duh mai a ni.

12-te leh 70-te chu Isua zirtîrte an ni ve ve a. A zirtîr tam tak zîng aṭangin tirhkohte tia a koh mi 12-te chu a thlang a ni. (Lk. 6:12-16) ‘Sâwm Pahnihte chu ko khâwm a, Pathian Ram thu hril tûr leh dam lote tidam tûra a tirh chhuah’ lai khân ani chu Galili-ah a awm a. (Lk. 9:1-6) A hnuah, Judai ramah Isua’n “mi dang sawmsarih a ruat a, . . . pahnih zêlin a tîr a.” (Lk. 9:51; 10:1) Chuvângin, a thuchah hrilh a nihna hmun hrang hrangah hnungzuitute a nei a ni.

Isua zirtîr Juda mite chuan an chhûngte nên kum tin Kalhlên Kût an la hman a rinawm a. (Ex. 12:6-11, 17-20) A thih hma lawkin, Isua leh a tirhkohte chu Jerusalemah an kal a ni. Mahse, a zirtîr zawng zawng chu Judai ram te, Galili ram te leh, Perea aṭangtea ko khâwmin Kalhlên Kût a hmanpui lo. Chuvângin, chumi hun chu a tirhkohte nên chauhva hman a duh tih a chiang hle. An hnênah: “Ka thil tuar hmain he Kalhlên Kût chaw hi eipui che u ka duh êm êm a ni,” tiin a sawi a ni.—Lk. 22:15.

Chutianga tih nachhan ṭha tak a nei a. Rei lo têah, Isua chu “Pathian Berâm No, khawvêl sual kalpuitu” angin a thi dâwn a ni. (Joh. 1:29) Chu chu hun rei tak chhûng Pathian hnêna halral thilhlan an lo hlan ṭhinna hmun, Jerusalema thleng tûr a ni a. Isua thihna chuan Israel chhûngkuate’n Aigupta aṭanga an kal chhuah dâwn zâna an ei berâm no avânga lo awm chhuah zalênna aia ropui zâwk chhuah zalênna a pe a ni. (1 Kor. 5:7, 8) Isua thiltih avâng chuan Sâwm Pahnihte chu Kristian kohhran lungphûm an rawn ni ang. (Eph. 2:20-22) Ngaihvenawm takin, khaw thianghlim Jerusalem chuan “Berâm No tirhkoh sâwm leh pahnihte hming” chuanna “lungphûm sâwm leh pahnih” a nei a ni. (Thup. 21:10-14) Ni e, tirhkoh rinawmte chuan Pathian thiltum thlen famkimnaah chanvo pawimawh tak an nei a. Chuvângin, Isua’n anni chu Kalhlên Kût hnuhnûng ber leh chumi zawha Lalpa Zanriah hmanpui a duh chu thil inâwm tak a ni.

70-te leh zirtîr dangte chu, chu zanriah kîlnaah Isua bulah awm ve lo mah se, zirtîr rinawm zawng zawngte chuan Isua hmêlhriattîr Lalpa Zanriah chu an hlâwkpui dâwn a. Chumi zâna Isua’n tirhkohte nêna a siam lalram thuthlungah chuan, a hnua hriakthih Kristian rawn ni chûng zirtîr zawng zawngte chu an tel a ni.—Lk. 22:29, 30