I Lo Hre Tawh Em?

Engvângin nge Bible-in thu ngai a sawi nawn ṭhin?

BIBLE ziaktute chuan thu ngai sawi nawn châng an nei ṭhîn a. Chutianga an tih chhan ni thei pathumte chu lo ngaituah ta ila:

Ziah a nih hun. Hmân lai Israel ramah chuan mi a tam zâwkin Dân bu chu mahnia chhiar tûr an nei lo va. A tlângpui thuin, biak bûka an punkhâwm hunah Dân thute a rîa chhiar chu an ngaithla ṭhîn a ni. (Deut. 31:10-12) Dârkâr eng emaw zât mipui zînga dinga an han ngaihthlâk chuan rilru la pêng thei thilte a awm ngei ang. (Neh. 8:2, 3, 7) Chutiang hunah chuan, thu pawimawh laite sawi nawnna chuan mipuite tân Pathian Lehkha Thute chhinchhiaha nunpui a tiawlsam dâwn a. A bîk takin, thu ṭhenkhat sawi nawnna chuan Pathian dânte leh rorêlte ang chi thu chipchiar takte chu chhinchhiah tûrin a ṭanpui dâwn a ni.—Lev. 18:4-22; Deut. 5:1.

Ziah a nih dân. Sâm bu te, Hla Thlan Khâwm te leh, Ṭah Hlate ang chi Bible bu ṭhenkhat chu hla thute a ni a. A châng chuan hla thupui ngaihventîr nân hla thute chu ziah nawn a ni ṭhîn a; chu chuan a ngaithlatute chu chhinchhiah tûrin a ṭanpui a ni. Entîr nân, Sâm 115:9-11-a thute hi lo chhinchhiah ang che: “Aw Israel-hote u, LALPA chu ring rawh u; ani chu anmahni ṭanpuitu leh an phaw a ni. Aw Arona chhûngte u, LALPA chu ring rawh u; ani chu anmahni ṭanpuitu leh an phaw a ni. LALPA ṭihtute u, LALPA chu ring rawh u: ani chu anmahni ṭanpuitu leh an phaw a ni.” A satute chu chûng thute sak nawnnain thutak hlu takte rilrua vawng reng tûra a ṭanpui theih dân chu i lo hmu em?

A pawimawhna lai sawi uar nân. Bible ziaktute chuan thu pawimawh laite ziah nawn châng an nei ṭhîn a. Entîr nân, Jehova’n Israel mite hnêna thisen ei lo tûra thu a pêk khân, Mosia hnênah chutianga thu a pêk chhan chu vawi tam tak a ziah nawntîr a ni. Pathian chuan nunna chu thisena a awm avângin, thisen chuan nunna a entîr tih a sawi uar a. (Lev. 17:11, 14) A hnuah, tirhkohte leh Jerusalema upate chuan Pathian tihlâwm nâna thil pawimawhte an târ lan khân, thisen laka inthiarfihlîm a pawimawhzia an sawi uar leh a ni.—Tirh. 15:20, 29.

Bible-in thu ngaite sawi nawn ṭhîn mah se, Jehova chuan Bible thute sawi nawn chu chîn ṭhana nei tûrin min duh tihna a ni lo. Entîr nân, Isua chuan: “In ṭawngṭaiin, . . . sawi nawn mai mai suh u,” tiin a sawi a. (Mt. 6:7) Ani chuan ṭawngṭainaa Pathian duh zâwng nêna inmila kan dîl theihte chu min hrilh a ni. (Mt. 6:9-13) Chuvângin, ṭawngṭainaa thu ngai chham nawn fo chu kan pumpelh rualin, thil pakhat atân kan dîl nawn thei a ni.—Mt. 7:7-11.

Pathian thâwk khum Thu chuan chhan ṭha tak neiin thu ṭhenkhat chu a sawi nawn a. Chu chu min Zirtîrtu Ropui Berin kan ṭhatna tûra min zirtîr dân kawng tam tak zînga pakhat a ni.—Is. 48:17, 18.