Chhiartute Zawhna
Leviticus 19:16-a kan hmuh mi dang “thisen thu-ah a ni lo zâwngin i ṭang tûr a ni hek lo,” tih thupêkin a sawi tum chu eng nge ni a, chuta ṭang chuan eng nge kan zir theih?
Jehova chuan Israel mite chu thianghlim tûrin a fuih a. Chumi atâna anmahni ṭanpui nân, an hnênah: “I chipuite zîngah mite rêlin i vâk vêl ruai tûr a ni lo va, i ṭhenawm thisen thu-ah a ni lo zâwngin i ṭang tûr a ni hek lo: kei hi Lalpa chu ka ni,” tiin a hrilh a ni.—Lev. 19:2, 16.
“A ni lo zâwngin i ṭang tûr a ni hek lo,” tih thu hlâwm hian a tîra Hebrai thuziakin a sawi tum chu chiang takin târ lang mah se, a sawi tum tak chu eng nge ni? Leviticus bu chungchâng ziahna Judate lehkhabu pakhat chuan: “He Bible châng lehlin a harsat chhan chu . . . [heta kan hmuh] Hebrai ṭawnga entîr nei ṭawngkam ‘kiangah ding suh,’ tihin a sawi tum chiah hriat thiam a harsat vâng a ni,” tiin a sawi.
Bible lama mi thiam ṭhenkhat chuan chu thu hlâwm chu a châng hmasaa: “Rorêlnaah chuan fel lo takin in rêl tûr a ni lo; mi rethei i thlei tûr a ni lo va, mi thiltithei i zah chuang tûr a ni lo va, fel takin i ṭhenawm ro i rêlsak tûr a ni,” tih nên hian an thlunzawm a. (Lev. 19:15) Chutiang a nih chuan, châng 16-naa kan hmuh ‘a ni lo zâwnga ṭang’ lo tûra thupêk awmzia chu Pathian mite chuan rorêlnaah te, sumdâwnnaah te, leh chhûngkaw thilahte dik lo takin an ti tûr a ni lo va, mahni hlâwkna tûrin thil dik lo eng mah an ti tûr a ni hek lo tihna a ni thei. Ni e, chûng thilte chu kan ti lo ngei ang; mahse, châng 16-na thu hi kawng dang awmze nei zâwka hriatthiam theih a ni.
Chu Bible chânga a tîr lam thu kha han ngaihtuah teh. Pathianin a mite chu mi dangte rêl, a nih loh leh sawichhe tûra vâk kual lo tûrin thu a pe a. Mite rêlna chuan buaina thlen thei a; mah se, sawichhiatna chu mite rêl mai aia nasa a ni tih hre reng ang che. (Thuf. 10:19; Thur. 10:12-14; 1 Tim. 5:11-15; Jak. 3:6) Sawichhiatna chu ṭawngkama târ lan leh mi dang hming ṭhatna tihchhiat tumna a ni fo va. Sawichhetu chuan mi dang chungchângah thu dik lo a sawi pawh ni thei a, chu chuan a sawichhiata nunna chu a tiderthâwng thei a ni. Sawichhetu ṭhenkhatin Nabotha chungchâng dik lo taka an sawi avângin, ani chu lunga den hlum a nih phah tih hre reng ang che. (1 Lal. 21:8-13) Ni e, Leviticus 19:16-na tâwp lama târ lan angin, sawichhetu chu mi dang thihna thlen khawpin dik lo takin a ṭang thei a ni.
Chu bâkah, tum rêng vâanga mi dang sawichhetu chuan huatna eng emaw chen a nei thei a. 1 Johana 3:15-ah heti hian kan chhiar a ni: “Tu pawh a unau hua chu tualthat a ni: tualthattu tu mah chatuana nunna pai rêng rêng an awm lo tih in hre si a,” tiin. Chu bâkah, châng 16-naa thute a sawi zawh hnua Pathian Jehova’n: “I rilruin i unau i haw tûr a ni lo,” tia a sawi belh hi a chhinchhiah tlâk hle bawk.—Lev. 19:17.
Chuvângin, Leviticus 19:16-naa chhinchhiah thupêk danglam tak chuan Kristiante tân zilhna khauh tak a pe a. Mi dang chungah rilru chhia kan pu tûr a ni lo va, kan sawichhe ngai tûr a ni hek lo. A awlsam zâwnga sawi chuan, mi chu kan ngainat loh avâng leh kan thîk avânga sawichhiaa ‘a ni lo zâwnga kan ṭang’ a nih chuan, amah kan huat vâng a ni thei a. Kristiante’n chu chu kan pumpelh ngei ngei tûr a ni.—Mt. 12:36, 37.