Ṭawngṭaina Chungchânga Mite Sawi Chu
“Ka ṭawngṭai hian Pathian chu ka bula awm ang leh kawngbo nia ka inhriat huna ka kut vuana min kaihruaitu angin ka hria.”—MARÍA-I.
“Ka nupui chuan kum 13 lai cancer natna a vei hnuah min boralsan a. Nî tin Pathian hnênah ṭawngṭaia rilrua ka tawrhnate ka phawrh chhuah hian ṭha takin min ngaihthlâksak ni hian ka hria a. Chu chuan rilrua thlamuanna min neihtîr a ni.”—RAÚL-A.
“Ṭawngṭaina hi mihringte hnêna Pathian thilpêk ṭha tak a ni.”—ARNE-A.
Ṭawngṭai hi María-i te, Raúl-a te, Arne-a te, leh mi dang tam tak tân thilpêk danglam tak a ni a. Anni chuan ṭawngṭaina hmangin Pathian an be thei a, a hnênah lâwmthu an sawi theiin, a ṭanpuina an dîl thei niin an hria a. Chu bâkah, Pathian hnêna ṭawngṭai chungchânga Bible thutiam: “Hei hi ama chunga kan huaina chu a ni, eng pawh a duh zâwng anga kan dîl chuan anin min ngaihthlâksak ṭhin hi,” tih chu an ring tlat a ni.—1 Johana 5:14.
Kawng leh lamah, mi tam tak chuan ṭawngṭaina chungchânga Bible sawite chu pawm harsa an ti a. Steve-a chuan ṭawngṭai chungchânga a ngaih dân chu heti hian a sawi a ni: “Kum 17 mi ka nihin ka ṭhian pathumte chu accident avângin an boral a. Pakhat chu motor chêtsualnaah a boral a, a dang pahnih chu tuiah an tla hlum,” tiin. Eng nge a tih tâk? “Chutiang thil a thlen chhante hriat tumin Pathian hnênah ka ṭawngṭai a; mahse, chhânna engmah ka hmu lo. Chuvângin, ‘Engvângin nge ka ṭawngṭai?’ tiin ka inzâwt a,” tiin a sawi. Chhân loh nia lang ṭawngṭainate chuan mi tam tak chu ṭawngṭainain awmzia a neih tak tak leh tak tak loh chungchângah rinhlelhna a neihtîr a ni.
Mite chuan chhan dangte avâng pawhin ṭawngṭai hlutna chu an ringhlel a. Mi ṭhenkhat chuan Pathianin thil engkim a hriat avâng leh kan mamawhte leh harsatnate a hriat vek avângin, a hnêna ṭawngṭai chu awmzia nei lo niin an sawi.
Mi dang lehte chuan tûn hmaa an thil tihsualte avângin an ṭawngṭainate chu Pathianin a ngaithla lo niin an ngai a. Jenny-i chuan, “Ka harsatna ber chu hlutna nei lo nia ka inhriatna hi a ni. Ka inchhîr lehna tûr thilte ka tih avângin, ka ṭawngṭainate chu Pathian chhân tlâk loh ni hian ka hria,” tiin a sawi.
Nang, ṭawngṭaina chungchâng hi engtin nge i ngaih? Chutianga rinhlelhna i nei ve a nih chuan, Bible-in chhânna lungawithlâk tak a pe thei tih hriatna aṭangin thlamuanna i nei thei a ni. Ṭawngṭainaa chungchânga Bible sawite chu kan rin theih bâkah, hêng a hnuaia zawhnate chhânna hmu tûr pawhin min ṭanpui thei bawk a ni:
Pathianin kan ṭawngṭainate chu a ngaithla tak tak em?
Engvângin nge ṭawngṭaina ṭhenkhat chu chhân a nih loh?
Pathian ngaihthlâksak ni tûrin engtin nge kan ṭawngṭai theih?
Ṭawngṭainain engtin nge min ṭanpui theih?
a Bible-ah hian Isua Krista ṭawngṭainate pawh tiamin, Pathian chhiahhlawhte ṭawngṭaina tam tak a chuang a. Thuthlung Hlui tia koh Hebrai Pathian Lehkha Thu-ah hian ṭawngṭaina chungchâng vawi 150 chuang târ lan a ni.