Tâwpna Huna Lal Indo Pahnihte

He chart-a târ lan hrilh lâwkna ṭhenkhat chuan hun inanga thilthleng indawtte a târ lang a. Chûngte chuan ‘tâwpna hunah’ kan awm tih kawng tam takin a finfiah a ni.—Dan. 12:4.

He chart hian hrilh lâwknate leh kum 1870 aṭanga tûn thlenga hmâr lam lal leh chhim lam lalte chu tute nge an nih tih a târ lang.

Bible Châng(te) Thup. 11:7; 12:13, 17; 13:1-8, 12

Hrilh Lâwkna “Sakawlh” chuan kum zabi tam tak chhûngin mite chu a thunun a. Tâwpna hunah, a lu sarihna chu tihhliamin a awm a ni. A hnuah, chu lû chu tihdam a ni a, “leia awm zawng zawng” chuan an zui a. Setana chuan sakawlh hmangin Pathian “thlah la awm” chu a bei a ni.

Thlen Famkimna Tuilêt hnuah, Jehova dodâltu mihring sawrkârte an lo chhuak a. Kum zabi tam tak hnuah, Khawvêl Indopui I-na chhûngin, British Empire chu nasa taka hliam a ni a. United States-in a rawn zawm hnu chuan a chak leh ta a ni. A bîk takin, he tâwpna hunah hian, Setana’n Pathian mite tihduhdah nân leia sawrkâr zawng zawng chu a hmang a ni.
Bible Châng(te) Dan. 11:25-45

Hrilh Lâwkna Tâwpna hun chhûnga hmâr lam lal leh chhim lam lal inbeihna.

Thlen Famkimna German leh Anglo-American thuneitute chu an indo va. Kum 1945-ah Soviet Union leh a ṭanrualpuite chu hmâr lam lal an ni. Kum 1991-ah, Soviet Union chu a kehchhia a, a hnuah, Russia leh a ṭanrualpuite chu hmâr lam lal an rawn ni ta a ni.
Bible Châng(te) Is. 61:1; Mal. 3:1; Lk. 4:18

Hrilh Lâwkna Jehova chuan Messia Lalram din a nih hmain, ‘kawng buatsaih’ tûrin a “tirhkoh” chu a tîr a. Chu “tirhkoh” chuan “thuhnuairawlhte hnênah chanchin ṭha” a hril ṭan a ni.

Thlen Famkimna Kum 1870 chho bâwr vêl aṭangin, C. T. Russell-a leh a ṭhiante chuan Bible thutak hrilhfiah tûrin theih tâwp an chhuah a. Kum 1881-ah, Pathian chhiahhlawhte tân thu hrilh chu thil pawimawh tak a ni tih an hre chhuak a. Anni chuan “Thuhriltu Mi 1,000 Mamawh A Ni,” tih leh “Hriak Thihte Chuan Thu An Hril Tûr A Ni,” tih thuziakte chu an tichhuak a ni.
Bible Châng(te) Mt. 13:24-30, 36-43

Hrilh Lâwkna Hmêlma chuan buh seng hun a thlen hmaa buh tak hliahkhuh khawpa ṭhang chho tûr buh lem chu buh tak zîngah a theh a, chumi hnuah, buh lemte chu buh tak zîng ata lâk hran an ni.

Thlen Famkimna Kum 1870 aṭangin, Kristian dikte leh Kristian dik lote danglamna chu a lang fiah tulh tulh a. Tâwpna hun chhûngin, Kristian dikte chu lâk khâwm an ni a, Kristian dik lote lakah tihhran an ni.
Bible Châng(te) Dan. 2:31-33, 41-43

Hrilh Lâwkna A kephah thîr leh hlum inpawlh chu thîr chi hrang hranga siam milima tel a ni.

Thlen Famkimna Hlum chuan Britain leh United States thuneihna hnuaia awm; mahse, an sawrkârna dodâltu mite a entîr a. Chûng mite avângin, chu khawvêl thuneitu chuan thîr anga a chakna chu a kimin a hmang thei lo a ni.
Bible Châng(te) Mt. 13:30; 24:14, 45; 28:19, 20

Hrilh Lâwkna “Buh tak” chu “buh inah” seng luh a ni a, “bawi rinawm, fing tak” chu “a chhûngte” chunga hotua siam a ni. “Ram chanchin ṭha” chu “khawvêl zawng zawngah” hrilh ṭan a ni.

Thlen Famkimna Kum 1919-ah bâwih rinawm fing tak chu Pathian mite chunga hotua ruat a ni a. Chumi hun aṭangin, Bible Zirlaite chuan nasa lehzualin thu an hril a. Tûn laiah, Jehova Thuhretute chuan ram 200 aia tamah thu hrilin, Bible ṭanchhan thu leh hla chhuahte chu ṭawng 1,000 chuangin an tichhuak a ni.
Bible Châng(te) Dan. 12:11; Thup. 13:11, 14, 15

Hrilh Lâwkna Ki pahnih nei sakawlh chuan ‘sakawlh lem siamnaah’ hma hruaiin, “sakawlh lem hnênah chuan thâwkna” a pe.

Thlen Famkimna Anglo-American Khawvêl Thuneitu chuan League of Nations dinnaah hma a hruai a. Chu pâwl chu ram dangte pawhin an thlâwp a ni. A tâwpah, hmâr lam lalin League of Nations chu a zawm a; mahse, kum 1926 aṭanga kum 1933 chhûng chauh a zawm a ni. A hnua lo awm United Nations (UN) ang bawkin, League of Nations hnênah chuan Pathian Ram chauhvin a dawn tûr chawimawina chu pêk a ni.
Bible Châng(te) Dan. 8:23, 24

Hrilh Lâwkna Lal hmêl hlauhawm tak chuan “mak takin a tichhia ang.”

Thlen Famkimna Anglo-American Khawvêl Thuneitu chuan mi tam tak tihlumin, thil tam tak a tichhia a. Entîr nân, United States chuan Britain nêna an hmêlma ram chungah atom bomb pahnih a thlâk a. Chu chuan tûn hmaa la thleng ngai lo chhiatna râpthlâk tak a thlen a ni.
Bible Châng(te) Dan. 11:31; Thup. 17:3, 7-11

Hrilh Lâwkna Ki sâwm nei sakawlh “sen tak” chu leilâwt aṭanga lo chhuakin, lal pariatna a rawn ni a. Daniela bu chuan chu lal chu ‘ṭiauna leh tenawmna,’ niin a sawi.

Thlen Famkimna League of Nations chu Khawvêl Indopui II-na chhûng chuan engmah ti thei lovin a awm a. Indona a tâwp hnuah, UN chu ‘din’ a ni a. League of Nations ang bawkin, Pathian Ram chauhvin a dawn tûr chawimawina chu UN hnênah pêk a ni a. UN chuan sakhuate chu a bei ang.
Bible Châng(te) 1 Thes. 5:3; Thup. 17:16

Hrilh Lâwkna Hnamte chuan “muanna leh himna” an puang a, “ki sâwm” leh “sakawlh” chuan “nawhchizuar” chu an bei a, an tiboral a ni. Chumi hnuah chuan, hnamte chu tihboral an ni.

Thlen Famkimna Hnamte chuan muanna leh himna an thlen tawh niin an puang mai thei. Chumi hnuah, UN thlâwptu ramte chuan sakhaw dik lo zawng zawng chu an tiboral ang a. Chu chu hrehawm nasa tak inṭanna chhinchhiahna a ni ang. Chu hrehawm nasa tak chu Isua’n Armageddon-a Setana khawvêl la bâng zawngte a tihboral hunah a tâwp ang.
Bible Châng(te) Ezek. 38:11, 14-17; Mt. 24:31

Hrilh Lâwkna Goga chuan Pathian mite ram chu a rûn a. Chumi hnuah, vântirhkohte chuan “thlante” chu an lâwr khâwm a ni.

Thlen Famkimna Hmâr lam lal chuan khawvêl sawrkârte ṭanrualpuiin Pathian mite a bei a. Chu beihna inṭan hnu lawkah, hriak thih la bângte chu vâna lâk chhoh an ni ang.
Bible Châng(te) Ezek. 38:18-23; Dan. 2:34, 35, 44, 45; Thup. 6:2; 16:14, 16; 17:14; 19:20

Hrilh Lâwkna ‘Sakawr vâr chunga chuang chuanin’ Goga leh a sipaite tiboralin, ‘hnehna’ a chang pumhlûm ta a. “Sakawlh” chu ‘mei dîlah paih’ a ni a, milim hrâwl tak chu tihkeh sawmin a awm a ni.

Thlen Famkimna Pathian Rama rorêltu Lal Isua chu Pathian mite chhandam tûrin a lo kal a. Ani chuan a rorêlpui mi 1,44,000 leh a vântirhkoh sipaite nên hnam insuih khâwm, Setana khawvêl pumpui chu a tiboral a ni ang.