KRISTIANTE ANGIN NUNG RAWH

Sakhaw Vawn Nei Lote Chu An Siamtu Hre Tûrin Ṭanpui Rawh

Sakhaw vawn nei lote chuan ṭha taka an chhân lêt loh i rin avângin, an hnêna thu hrilh chu i hreh ṭhîn em? I hreh ṭhîn a nih chuan, sakhaw vawn nei lo tam tak chu—Pathian awm ring lotute pawh tiamin, Jehova Thuhretute an rawn ni tih hre reng ang che. An mamawh chu Pathian a awm tih finfiahnate endik tûra ṭanpuina tlêm azâwng pêk hi a ni.—Rom 1:20; 10:14.

RINNA NEI LOTE’N AN NEI CHHO THEI TIH HRE RENG RAWH!— SAKHAWMI LOTE TIH VIDEO EN HNUAH, A HNUAIA ZAWHNATE HI CHHANG ANG CHE:

Engtin nge Tommaso-a thiltawn chuan sakhaw vawn nei lote hnêna thu hrilhna kawngah a êng zâwnga thlîr tûra a ṭanpui che?

I chhânna

A tih dan tur

Miin Pathian a rin loh thu a sawi chuan, chumi chungchânga a ngaih dânte leh a thlîr dânte chu ṭha taka ngaihthlâksakin a chungah ngilneihna leh remhriatna lantîr ang che. (2 Tim. 2:24) A tui zâwng tûra i ngaihte chu sawipui la. Ani chu mi tam takin Siamtu a awm tih an rin nachhan finfiahnate chu sawipui theih a ni em? Sawipui theih a nih chuan, chumi atâna tihchhuah thu leh hla chhuahte leh video-te chu hmang ang che. Was Life Created? tih leh The Origin of Life—Five Questions Worth Asking tih brochure-te chu chutiang mite’n awlsam taka an chhiar theih nân kan Zirtîrna Hmanraw Bâwma telh a ni.

A tîr chuan, Pathian ring lotu tu emaw chu thutak chungchâng sawipui i hreh mai thei a. Engvângin nge tawn hriat ngah tak thuchhuahtu chu ṭanpuina i dîl loh vang? Rilru dik tak pute chuan Pathian a awm tih an ring nghâl mai lo a nih pawhin an thinlung thlen tûrin Jehova’n min ṭanpui thei tih hre reng ang che.—Tirh. 13:48.