He Kalhmang Tâwpna Hi Inrintâwkna Nên Thlîr Tlat Rawh

He khawvêl chunga Jehova dawhtheihna chu a tâwp thuai dâwn a. Sakhaw dik lo tihchhiat a ni ang a, hnam insuihkhâwmin Pathian mite an bei ang a, Jehova’n Armageddon-ah mi suaksualte a tiboral ang. Kristiante chuan hêng hun pawimawh tak leh phûrawm takte hi an nghâkhlel hle a ni.

Mahse, hrehawm nasa taka thil thleng tûrte chu kan hre vek lo va. Entîr nân, chumi inṭan hun tûr chiah chu kan hre lo. Politics thiltihtheihnain sakhuana bei tûra chhuanlam an siam tûr chu kan hre lo va. Hnamte’n Pathian mite an beih hun tûr rei zâwng emaw, chumia tel tûr emaw chu kan hre hek lo. Jehova’n Armageddon-a mi suaksualte tihboral nâna a thil hman tûr chiah chu kan hre lo bawk.

Amaherawh chu, Bible chuan inrintâwkna leh huaisenna nêna nakin hun hmachhawn tûra kan hriat ngai zawng zawngte chu min hrilh a ni. Entîr nân, ‘ni hnuhnûng’ tâwpah kan nung tih kan hria a. (2 Tim. 3:1) Sakhaw dik tihchhiat a nih loh nân sakhaw chunga beihna chu “tih tâwi” a ni ang tih kan hre bawk. (Mt. 24:22) Jehova’n a mite a chhan chhuak ang tih kan hria a ni. (2 Pet. 2:9) Chu bâkah, Jehova’n mi suaksualte tiboral tûr leh Armageddon paltlang tûra mipui tam takte vênghimtu tûr a mi thlan chu dik tak leh thiltithei tak a ni tih kan hre bawk.—Thup. 19:11, 15, 16.

Nakina thil lo thleng tûrte avângin mite chu hlauvin “an thidang ang.” Mahse, Jehova’n hmân laia a mite a chhanhim dân kawngte leh nakin hun chungchâng a târ lan te chhiar a, chhût ngunna hmangin kan chhandamna chu a hnai a ni tih hriain ‘en chhovin kan dâk chhuak’ thei a ni.—Lk. 21:26, 28.