Bible Zirna Ṭan Tûra September Thlaa Special Campaign

September thla chhûngin Chatuanin I Hlim Thei! brochure hmanga chhûng tinte Bible zirpuia sâwm tûrin theih tâwp kan chhuah dâwn a. Thuchhuahtute chuan dârkâr 30 hmua auxiliary pioneer thawh an thlang thei ang. Engtin nge he special campaign-ah hian kan tel theih?

• Tlawh Hmasak Bernaah: Brochure kâwm hnung lam chu an tuina chawhthawh nân hmang la, Bible zirna neih dân entîr tum ang che. Tlawhkîrte pawh tiamin, tûn hmaa tuina lantîrtute chu hre reng ang che. Tûn hmain zirna neih duh lo mah se, kan zirtîr dân thar leh brochure thar chu an ngaihven pawh a ni thei. Brochure chu ina awm lote hnênah hnutchhiah lo la, tûn hmaa tuina lantîr lotute hnêna lehkha i thawnnaah thun tel suh. Kohhrana Service Committee chuan chumi thla chuan rawngbâwlna atâna inkhâwmna dang nei tûrin ruahmanna a siam pawh a ni thei.

• Hun Remchâng Dangte: In kohhranin thu leh hla pho chhuahna nawrlirh a hmang a nih chuan Chatuanin I Hlim Thei! brochure chu pho chhuak tel la. Ngaihventute chu brochure an dawn rualin, a thlâwna Bible zirna an dawng tel thei tih hriattîr ang che. In inbiak laiin Bible zirna neih dân tâwi têin entîr la, a nih loh leh a hnua ti tûrin ruahmanna siam ang che. Service overseer chuan thuchhuahtu tling takte chu bial chhûnga sumdâwnna hmuna kal a, Bible zirpui sâwm tûrin a ruahman thei a. I hnathawhpuite, a nih loh leh tawn chawpa i thu hrilhte chu Bible zirpui tûrin i sâwm thei bawk.

Isua chuan “zirtîrahte siam” tûr leh “zirtîr” tûrin thu min pe a. (Mt. 28:19, 20) He special campaign hian Chatuanin I Hlim Thei! brochure hmanga he thiltum hi hlen tûrin min ṭanpui rawh se.