Harsatna Zawng Zawngte Hian Tâwp Nî A La Nei Ang

Harsatnate hian awlsam takin min tilunghnual thei a, a bîk takin hun rei tak a awh hian a ni lehzual. Davida chuan Lal Saula thlentîr harsatna chu a la tâwp dâwn tih leh Jehova’n a tiam angin lal a la ni dâwn tih chu a hria a. (1 Sam. 16:13) Chu a rinna chuan dawhthei tûr leh Jehova nghâk tûrin a ṭanpui a ni.

Harsatna kan tawh hian kan dinhmun thlâk danglam tûrin finna, hriatna, leh ngaihtuah theihna kan hmang thei a. (1 Sam. 21:12-14; Thuf. 1:4) Amaherawh chu, Bible thu bulte mila theih tâwp kan chhuah hnuah pawh harsatna ṭhenkhat chu a la awm zawm zêl ang. Chutiang dinhmunah chuan dawhtheihna kan lantîr a, Jehova kan nghah a ngai a ni. Rei lo têah, kan hrehawm tawrhnate titâwpin, kan “mittui zawng zawng a hru fai ang.” (Thup. 21:4) Pathian Jehova inrawlh vâng, a nih loh leh chhan dang avângin hahdamna kan nei emaw nei lo emaw pawh ni se, thil chiang tak pakhat a awm: chu chu harsatnate hian tâwp nî a nei ngei dâwn a ni tih hi. He thu dik hian thlamuanna eng emaw chen min pe thei a ni.

INṬHEN HRANNA KHAWVELA INPUMKHATNA NEITUTE TIH VIDEO EN HNUAH, A HNUAIA ZAWHNATE HI CHHANG ANG CHE:

• United States chhim lama Kristian ṭhenkhatte’n eng harsatna nge an tawh?

• Engtin nge dawhtheihna leh hmangaihna an lantîr?

• Engtin nge “thil pawimawh zâwkte” an ngaihtuah tlat?—Phil. 1:10, NWT