Rawngbâwlnaa Hman Nghâl Theih Inhmuhkhâwmna Kaihhruai Dân

Inkhâwm dangte ang bawkin thlawhhma rawngbâwlna atâna inhmuhkhâwmna chu Jehova thilpêk a ni a, chu chuan hmangaih leh thil ṭha tiha inchawk tho tûrin min ṭanpui thei a ni. (Heb 10:24, 25) Chu chu minute nga aṭanga minute sarih vêla rei a ni tûr a ni a, chutah chuan kawp siam te, kalna tûr bial ruatna te, leh ṭawngṭainate a tel a ni. (Kohhran inkhâwm bâna neih a nih chuan chu aiin a tawi lehzual tûr a ni.) Kaihruaitu chuan chumi nîa rawngbâwlnaa telte tâna hman nghâl theih tûr thu engemaw a inbuatsaih tûr a ni. Entîr nân, Inrinnia tel a tam zâwk chu chawlhkâr chhûnga chhuak lote an nih chuan, thu sawi dân tûr sawiho mai chu a ṭangkai thei ang. Thu dang engte nge sawiho atân ṭha ang?

• Kan Kristian Nun leh Rawngbâwlna—Inzirna Lehkhabu-a inbiak dân tûr entîrnate

• Inbiak ṭan nâna tûn hnaia thilthleng emaw, chanchin thar emaw hman dân

• Hnialkalh ṭhinna pakhat ṭha taka chhân lêt dân

• Pathian awm ring lotu, chanchhâwnna ringtu, ṭawng dang hmang, a nih loh leh tualchhûnga hriat tam lêm loh sakhaw vuantu tuemaw chhân lêt dân

• Kan website jw.org hmêlhmang pakhat, JW Library^® app hman dân, a nih loh leh Bible hman dân

• Zirtîrna Hmanraw Bâwm-a hmanraw pakhat hman dân

• Phone hmanga thu hrilhna, lehkha thawn ziaka thu hrilhna, vântlâng hmuna thu hrilhna, tlawhkîrna, a nih loh leh Bible zirna ang chî rawngbâwlnaa tel dân

• Himna, insiamrem theihna, nungchang mawi, rilru put hmang dik, a nih loh leh chutiang chî thil engemaw chungchânga hriatnawntîrna

• Chhiar leh Zirtîrna Kawngah Inhmang Rawh tih brochure-a zirlai pakhat, a nih loh leh video pakhat sawi

• Thlawhhma rawngbâwlnaa i kawppui fuih theih dân leh ṭanpui theih dân

• Rawngbâwlna nêna inkûngkaih Bible châng pakhat, a nih loh leh rawngbâwlnaa mi tichak thei tak thiltawn pakhat sawi