Rawngbâwlnaa Thiamna Tihhmasâwn Dân—Bible Zirpui Hmasâwn Lote Titâwpin

A PAWIMAWH CHHAN: Chhandam ni tûr chuan Jehova hming lam a ngai a. (Rom 10:13, 14) Mahse, Bible zir nazawng chuan Jehova tehnate mila nun chu an duh chuang lo. Rawngbâwlnaah Jehova tihlâwm nâna insiam ṭha duhte ṭanpuina hmangin kan hun hlu takte chu a ṭha thei ang berin kan hmang a. Bible zirlaiin hun engemawti chhûnga hmasâwnna engemaw tal a neih loh chuan, zirna chu titâwpin, Jehova’n amah leh a inawpna pâwl lama a hîp mi dangte ṭanpui nân kan hun hlu tak chu kan hmang zâwk a ni. (Joh. 6:44) Mahse, a hnuah inthlâk danglamna ṭhenkhat nei a, “chatuana nun duhna rilru dik tak neite” zînga mi a nihzia a lantîr chuan zirna chu lâwm takin kan ṭan ṭha leh ang.—Tirh. 13:48, NW.

A TIH DAN TUR:

• Zirlai chu hriatna dik neih a duh vângin fak rawh.—1 Tim. 2:4

• A thu zirte nunpui a pawimawh chhan sawi uar rawh.—Lk. 6:46-49

• Isua buh chi thehtu tehkhin thu chu sawipuiin, a thu zirte a nunpui theih loh chhan chu zâwt rawh.—Mt. 13:18-23

• I zirpui tawh dâwn loh chhan chu thiam takin hrilhfiah rawh

• Amah fuih tûrin a châng chânga i tlawh tûr thu leh hmasâwnna a rawn neih chhoh chuan zirna i neihpui leh tûr thu hrilh rawh

VIDEO IN EN HNUAH, A HNUAIA ZAWHNATE HI CHHANG ANG CHE U:

• An inbiakna aṭangin Bible zirlai chuan thlarau lamah hma a sâwn lo tih târ langtu eng nge i hmuh?

• Engtin nge thuchhuahtu chuan zirlai chu a insiam ṭhat a ngai tih hre thiam tûra a ṭanpui?

• Engtin nge thuchhuahtu chuan nakina zirna neih leh theihna kawng a hawn?