Bible Zirtîrna Bu Hmêlhmang Chu Hmang Ṭangkai Rawh

Bible zirpuiin Bible zirtîrna dik tak a zirte a nunpui chuan, hma a sâwn chhovin, thlarau rahte a chhuah ang. (Sâm 1:1-3) Bible Zirtîrna bua hmêlhmangte chu hmang ṭangkaiin, kan Bible zirpui chu hma sâwn tûrin kan ṭanpui thei a ni.

Thuhmahruai Zawhnate: Bung tinte chu a chhûng thuin a chhân tûr zawhnatein a inṭan a. In thu zir tûr hriat châkna a neih nân, chûng zawhnate chu a chhân beisei si lovin i chhiarsak thei ang. A nih loh pawhin, zawhna tinte chu tâwi têa chhâng tûrin i sâwm thei ang. Chhânna dik lo a pêk pawhin, ngaih pawimawh tûr a ni lo. A chhânna pêk chuan, ngaihsak ngai leh sawi uar ngaite hre thiam tûrin a ṭanpui ang che.—Thuf. 16:23; 18:13.

Thu Belhna: Zirpui chuan lehkhabu chhûnga thu pawimawhte chu hre thiama a pawm chuan, thu belhnaa thuawmte chu amaha ennawn leh tûrin i fuih thei a. Zir leh hunah, a zirte chu a hre thiam ngei tih chian nân hun rei lo tê i hmang thei ang. Mahse, a ṭangkaipui dâwn a nih chuan, zirna neih laiin thu belhna emaw, chuta thu awm ṭhenkhat emaw chu paragraph chhiara sawiho nân, leh zawhna i inbuatsaih lâwkte zawh nân hun i hmang tûr a ni.

Ennawnna Bâwm: Bung tin tâwpa ennawnna bâwma thute chuan thuhmahruaia zawhnate chu a chhâng a. I zirpui chuan a hre thiamin, thu pawimawh laite a hrilhfiah thei tih tihchian nân he ennawnna bâwm hi i hmang thei a ni. Bâwma thute chu chhiar chhuak dûn ula, chuta awm Bible chângte pawh chhiar dûn ang che u. Tichuan, bâwma thu awmte a dik tih hrilhfiah nâna Bible châng(te) hmang tûrin i zirpui chu sâwm ang che.—Tirh. 17:2, 3.