Zirtîr Siamna Ngaihsak Reng Rawh
1. Mite chhandam ni tûr chuan eng nge tih ngai?
1 Kum 2014 rawngbâwl kum report chuan, Lalram chanchin ṭha hrilhna kawnga Pathian mite ṭhahnemngaihna leh an tum ruhna a târ lang a. (Mt. 24:14) In tina thu hrilhna te, tract leh sâwmna dangte sem chhuahna special campaign neih te, leh vân tlâng hmuna thu hrilhna neih ṭanna te avângin, tûn hma zawng aiin Bible thuchah chu mi tam zâwkte hnênah kan thlen a. Mahse, mite chhandam ni tûr chuan, Bible zirpuina hmangin Isua zirtîr ni tûrin kan ṭanpui tûr a ni.—1 Tim. 2:4.
2. Eng ang zawhnate inzawhnain nge Bible zirpui neih tum reng tûrin min ṭanpui ang?
2 Bible Zirpui Neih Tum Reng Rawh: Miin tuina a lantîr hunah, a address kimchang neih tumin, Bible zirna neihpui tûrin i bawhzui nghâl em? Tlawh hmasak ber ṭuma Bible zir dân entîr i tum hnuhnûn ber chu engtik khân nge? Engtik khân nge i magazine kawnga mite chu Bible zirpui i tum hnuhnûn ber? Engvângin Nge Bible I Zir Ang? tih leh Bible Zirnaah Eng Nge Thleng Ṭhîn? tih video-te chu i hnathawhpuite, school kalpuite, ṭhenawmte, chhûngkhatte, leh hmêlhriat dangte chu i entîr tawh em? Thu leh hla pho chhuahna i hman hunah, Bible zir nâna kan hman lehkhabu latute chu Bible a thlâwnin kan zirpui tih hrilh hriat i tum em?
3. Thutak hlawhtling taka zirtîr theih nân eng nge ngai?
3 Jehova leh Isua Hnên Aṭanga Ṭanpuina: Isua’n “zirtîrahte siam” tûra a thupêk chu “kal ula,” tih thuin a ṭan a; chu chuan ṭan la tûr leh hma la tûr kan nihzia a târ lang. Mahse, keimahni chauhvin min kalsan lo va, awmpui tlat min tiam a ni. (Mt. 28:19, 20) Chu bâkah, Jehova chuan a thlarau thianghlim pawh tiamin mite thutak zirtîr tûra kan mamawh hmanruate leh zirtîrnate min pe a. (Zak. 4:6; 2 Kor. 4:7) He hna pawimawh taka tel tûra kan mamawh “châkna leh thiltihtheihna” min pe tûrin kan ṭawngṭai thei a ni.—Phil. 2:13, NW.
4. Engvângin nge zirtîr siamna kan ngaihsak reng a ngaih?
4 Chanchin ṭha hrilhna chuan hlimna nasa tak min thlen a. Mahse, mite thutak kan zirtîr a, ‘nunna kalna kawngkaa’ lût tûra kan ṭanpui hian kan hlimna chu a pung lehzual a ni. (Mt. 7:14; 1 Thes. 2:19, 20) Chu ai maha pawimawh zâwk chu, zirtîr siamna kan ngaihsak rengna hian, ‘tumah boral lova, mi zawng zawng simtîr duhtu’ Jehova kan tilâwm hi a ni.—2 Pet. 3:9.