Zirtîrnaah Thiamna Tihmasâwn Rawh—Thu Pawimawh Laite Târ Chhuakin
1 “Zirtîrtu ni . . . âwm in ni,” tiin Paula chuan Hebrai mite hnênah lehkha a ziak a. (Heb. 5:12) Isua min pêk zirtîr siamna hna ropui takin a vâwrtâwp a thlen hun, kan tûn lai hunah hian, chu thute chu a dik hle bawk a ni. Zirtîrnaa thiam lehzual tûra min ṭanpuitu pakhat chu kan thu chhiar leh kan thu zirtîrte awmze tlângpui hriat thiamna neih hi a ni. Hei hian kan zir mêk lehkhabu bu pum bâkah, a chhûnga bung khat leh chu mia paragraph-te thu tlângpui hriat pawh a huam tel a ni.
2 Lehkhabu kâwma thupui chuang chu a chhûnga thute khaikhâwmtu thupui ber a ni a. Chu mi bu aṭanga a zirtîr hunah, zirtîrtu chuan bung tina thupuite leh lehkhabu kâwma chuang a thupui ber chu a thlunzawm thiam tûr a ni. Chu mi pahnih inkûngkaihna hmu thiam tûrin zirlai chu ṭanpui rawh. A tlângpui thuin, bung pakhata kan thu khel lai chuan a thupui ber pêng pakhat chu a tifiah, a nih loh leh a tilang a ni. Entîr nân, “Pathian Tilâwmzâwnga Nun” tih leh “Chhûngkaw Nun Hlim Siam Dân” tih bungte chuan zirlai chu Bible zirtîrna dik tak hmu thiam tûrin a ṭanpui a ni.
3 Thuziak pakhat emaw, bung khat emawa a thupuitête chu a thu pawimawh laite lâk chhuah nân a ṭangkai a. Bung khat chhûnga paragraph tinte chu kawng engemaw ti takin a bung khat thupui nên inkûngkaihna a nei a ni. Paragraph tin aṭangin bung khat thupui nêna inkûngkaih hnai ber thute chu zawng chhuak ang che. Chu chu i zirtîr huna zirlai thinlunga i tuh duh tûr thu pawimawh lai tak chu a ni.
4 Zawhna chhut chhuahsa awmna lehkhabu hmanga i zirpui hunah, a chhânna chu ṭawngkauchheh pakhat emaw, a nih loh leh, a châng chuan thu mal pakhat emaw a ni tlângpui ṭhîn a. Zirlai chu a chhânna thu mal pakhat emaw, ṭawngkauchheh emaw chauh rîn tûrin zirtîr rawh. Hei hian ṭangkaina tam tak a nei a. Pakhatah chuan, a paragraph chhiar thui ngai lovin a chhânna a hmu nghâl thei ang. A chhân hunah a lo rîn tawh lehkhabu aṭanga thui tak chhiar mai ai chuan, ama îrâwm chhuaka sawi tûrin fuih ang che. Thu mal tlêm tê a rînte chu enin, a rilruah a zirlai chu eng chungchâng nge a nih a hre chhuak zung zung thei ang.
5 Zirtîrtu leh zir lai tâna thil hlu tak chu lehkhabua hawrawp âwn hman hi a ni a, chu chuan paragraph chhûnga thu mal pawimawh leh ṭawngkauchhehte, a nih loh leh Bible chânga a pawimawh laite chu a târ chhuak a ni. Bible zirlai chu hawrawp âwna thuziakte hman a nih dân hriatthiamtîr ngei ang che. Chu chu mi dangte hnêna a rinna a sawifiah hunah a la ṭangkai dâwn a ni.
6 Thu pawimawh laite hman dân tûna kan târ lan tâkte hi Vênnainsâng Zirna kaihruaitu tân, Bible Zirna kaihruaitu tân leh in lama Bible zirna kaihruaitu tân bâkah, naupangte zirtîrnaah pawh a hman theih vek a ni. Isua chuan ‘zirtîrte siama anmahni zirtîr’ tûr kan ni tih a sawi a. (Mt. 28:19, 20) Thu pawimawh laite târ chhuah dân zirna chuan chu mawhphurhna chu hlen tûrin min ṭanpui ang.