I Hun Remchâng Neih Chu Lalram Thuchah Thehdarh Nân Hmang Rawh!

1. Davida entîrna aṭangin eng nge kan zir theih?

¹ Lal Davida chuan a dinhmunin engmah tithei lova a siam chu a duh ngai lo. Entir nân, Jehova tân in saksak a duh a. Mahse, a sak phal a nih loh tâkah chuan a thiltumte siam remin, a fapa Solomona’n a sak theih nâna a mamawh tûrte chu a la khâwm ta zâwk a ni. (1 Lal. 8:17-19; 1 Chro. 29:3-9) Davida chuan a thil tih theih lohte ngaihtuah aiin, a tih theihte chauh a ngaihtuah zâwk a ni. Lalram thuchah thehdarh dân kawng kan zawnnaah engtin nge Davida entîrna chu kan entawn theih?

2. Engtin nge mahni kan inenfiah theih?

² I Tih Theih Chu: Mi tam tak chuan auxiliary pioneer emaw, regular pioneer emaw an thawh theih nân an nun an tisamkhai a. (Mt. 6:22) I thawk ve thei ang em? Ṭawngṭaina nêna i dinhmunte i enfiah chuan, “kawngka zau tak leh sâwt tak” chu i tân a inhawng reng tih i hmu mai thei a ni. Chuti a nih chuan, chu hun remchâng chu hmang ṭangkai ang che!—1 Kor. 16:8, 9.

3. Kan dinhmun avânga pioneer kan thawh theih loh pawhin, thu hrilh nân eng hun remchângte nge kan hman ṭangkai theih?

³ I dinhmun avângin pioneer thawk thei lo ta la, engtin nge ni ang? I tâna inhawng hun remchâng dangte chu hmuh hmaih suh ang che. Entîr nân, i hnathawh avângin pâwn lam mite nên in inbe ṭhîn a nih chuan, engvângin nge chu chu remchânga lain anni chu thu i hrilh loh vang? A nih loh leh inenkawl mêk i nih chuan, nangmah enkawltute hnênah thu i hrilh thei ang em? Kum upat vâng emaw, dam loh vâng emawa thlawhhma rawngbâwlnaa tel thei lote tân minute 15 bi zêlin report a pêk theih tih hre reng rawh. Tichuan, thla tina rawngbâwlna report i pêk hunah, tawn chawpa thu i hrilhna hun te, tract leh Hriatrengna leh inkhâwmpui sâwmna i pêkte pawh tiamin, thu leh hla chhuah i semte chu ziak tel ngei ang che. Chutianga hun chhe tê tê i hmante belhkhâwm chu i rin aia a lo tam tâk avângin mak i hle ngei ang!

4. Eng nge tih i tum tlat?

⁴ Kan dinhmunte chu eng pawh ni se, hun remchâng kan neih apiang chu chanchin ṭha thehdarh nân i hmang ang u. Chutianga kan tih chuan Lalram tân theih tâwp kan chhuah a ni tih inhriatna aṭanga lo awm lungawina chu kan nei ang.—Mk. 14:8; Lk. 21:2-4.