Hlâwk Taka Rawngbâwl Theihna Remchâng A Inhawng

Chanchin ṭha hriltu ṭhahnemngai tak a nih angin, Paula chuan mamawh zualna hmun chu phûr takin a zawng a, mamawh zualna zîngah chuan Ephesi khua pawh a tel a ni. Chuta a thu hrilhna a hlawhtlin êm avângin, a Kristian unaute hnênah heti hian a ziak a ni: “Hetah hian hlâwk taka rawngbâwl theihna remchâng a inhawng reng a ni,” tiin. (1 Kor. 16:9 C.L. Re-edited) Chutah chuan rawngbâwl zawm zêlin, Ephesi khuaa mi tam takte chu ringtu ni tûrin a ṭanpui a ni. (Tirh. 19:1-20, 26) Tûn laiah pawh, kan tân hlâwk taka rawngbâwl theihna remchâng chu a inhawng a. Thu hrilhna campaign kan neih hian tuina tam tak a chawk chhuak a, a bîk takin thu hrilh lohna bialah a chawk chhuak lehzual a ni. Chuvângin, thu hrilh tam lohna biala chanchin ṭha hril tûr leh tuina neite bawhzui tûra sâwm kan ni.—2 Korinth 8:13-15 nên khaikhin rawh.

Mamawh Zualna Hmunah Rawng I Bâwl Thei Ang Em? Hmun danga rawng i bâwl theih dâwn leh dâwn loh ṭawngṭaina nên ngun takin i ngaihtuah tawh ngai em? Tûn hnai kum sâwm bi-ahte khân, Kristian chhûngkua a sâng têlte chu mamawh zualna hmunah insawnin buh sengnaah ṭhahnemngai takin an tel tam lehzual a. Chutianga thawk nupa tuak khat chuan: “Kan ṭangkai theihna ber tûr hmuna Jehova rawngbâwl chu kan duh a ni,” tiin an sawi. Chutiang duhna i neih a, hmun danga i insawn thei dâwn a nih chuan in kohhran upate sawipui ang che. Chu mi hnuah, bial kaltu sawipui la, a rawtna ngaichâng ang che.

Mamawh zualna hmun chungchângah branch office i zâwt duh a nih chuan, i duh dân chu ziakin Kohhran Service Committee hnênah pe ang che. Anni chuan branch office-ah an ngaih dân ziak chhuahna lehkha rualin an thawn ang. Engpawh ni se, hlâwk taka rawngbâwl theihna remchâng a inhawn chhûng hian, kan vaiin Jehova rawngbâwlnaah ṭhahnemngai takin i thawk fo vang u.—1 Kor. 15:58.