Hun Vawn Dik Chu Chîn Ṭhanah Nei Rawh

1. Hun vawn dik chungchângah Jehova chuan entawn tûr eng nge a siam?

¹ Jehova chuan hun a vawng dik reng a. Entîr nân, a chhiahhlawhte chu ‘puih an ngaih hunah’ a ṭanpui a. (Heb. 4:16) “A hun apianga” thlarau lam chaw pein a enkawl bawk a ni. (Mt. 24:45) Chuvângin, a thinrimna nî lo thleng tûr chu “a tlai chuang lo vang,” tih kan ring nghet tlat thei a ni. (Hab. 2:3) Jehova hun vawn dikna chu kan va hlâwkpui tak êm! (Sâm 70:5) Mahse, mihring ṭha famkim lo buai thei takte kan nih avângin, hun vawn dik chu kan tân thil harsa tak a ni thei. Engvângin nge hun vawn dik chu chîn ṭhanah kan neih ang?

2. Engvângin nge hun vawn dikna chuan Jehova a chawimawi?

² He ni hnuhnûngah hian mi tam takte chu mahni inhmangaihtute leh insûm thei lote an nih avângin hun hi an vawng dik lo fo ṭhîn. (2 Tim. 3:1-3) Chuvângin, Kristiante chu hnathawhnaah te, an intiamna hunah te, leh inkhâwmah te a hun takah an thleng ṭhîn tih mi dangin an hmuh hian, chu chuan Jehova a chawimawi a ni. (1 Pet. 2:12) Kan ei zawnna hnathawh chu a hun dik takah kan ṭan ṭhîn chung pawhin, inkhâwm leh inkhâwmpuiahte hian kan tlai ṭhîn em? Ṭanna hla sak leh ṭawngṭainaa tel thei tûra a hun taka thlenna chuan engkim fel taka ti ṭhîntu kan Pa vâna mi entawn kan duhzia a târ lang a ni.—1 Kor. 14:33, 40.

3. Engvângin nge hun vawn dikna chu mi dangte kan ngaihtuahzia lantîrna a nih?

³ Hun vawn dik chu mi dangte kan ngaihtuahzia lantîrna a ni bawk. (Phil. 2:3, 4) Entîr nân, thlawhhma rawngbâwlna atâna inkhâwmna pawh tiamin, Kristian inkhâwmnaa a hun taka kan thlen chuan kan unaute chu ṭûl lo takin kan tibuai lo vang. Kawng lehlamah, kan tlai ṭhîn a nih chuan, mi dangte chu an hun aiin kan hun kan ngaihlu zâwk tih ngaih dân kan neihtîr thei a. Hun vawn dikna chuan kan vêla awmte ngaihhlut mizia—rin tlâkna te, taihmâkna te, leh rinawmna te—kan neihzia a târ lang a ni.

4. Kan tlai ṭhîn a nih chuan engtin nge kan insiam ṭhat theih?

⁴ I tlai ṭhîn a nih chuan a chhan ngaihtuah rawh. I hnathawh tûrte chu a hun ruat chhûnga i zawh fel theih nân hun duan ṭha siam rawh. (Thur. 3:1; Phil. 1:10) Tin, Jehova hnênah a ṭanpuina dîl ang che. (1 Joh. 5:14) Hun vawn dik chu—Pathian leh vêngte hmangaih tûra Dân thupêk ropui ber pahnih kan ngaihhlutzia lantîr dân kawng khat a ni.—Mt. 22:37-39.