Zâwlneite Chu Entawn Atân Hmang Rawh—Mika
1. Eng zawhna nge Mika chuan a ngaihtuah mai theih a, mahse, engvângin nge a thu hrilhna chu a thlâwn mai a nih loh?
1 ‘He khawvêl kal hmang chhe tak hi engtikah nge a tâwp ang?’ Zâwlnei Mika chuan Israel leh Juda lalram chunga Jehova rorêlna thuchah a puan chhuah khân chutiang zawhna chu a ngaihtuah mai thei. Mahse, a thu hrilhna chu a thlâwn lo. B.C.E. 740-ah Mika dam lai ngeiin Jehova thusawi chu Samari mite chungah a thleng famkim a ni. (Mik. 1:6, 7) A hnu B.C.E 607-ah Jerusalem chu tihchhiat a ni bawk. (Mik. 3:12) Kan hun laia Jehova rorêlna kan nghah lai hian engtin nge Mika chu kan entawn theih?
2. Jehova nî kan nghah laiin engtin nge dawhtheihna kan lantîr ang a, engvângin nge?
2 Dawhtheihna Nei Rawh: Mika chuan: “Kei erawh chuan LALPA lam ka en ang a; ka chhandamna Pathian chu ka nghâk ang,” tiin a ziak a. (Mik. 7:7) Chutih rual chuan, tâwpna lo thlen hun tûr chu a nghâk satliah mai lo. Jehova zâwlnei a nih angin, rawngbâwlin a buai reng a ni. Jehova nî kan nghah laiin, ‘awm dân thianghlim leh Pathian ngaihsakin kan awm tûr’ a ni bawk. (2 Pet. 3:11, 12) Jehova dawhtheihna chuan mi mal tinte tân simna hun a pe a. (2 Pet. 3:9) Chuvângin, zâwlneite dawhtheihna entawn tûra Pathian min fuihna chu kan zâwm a ni.—Jak. 5:10.
3. Engvângin nge Jehova hnênah a thlarau thianghlim kan dîl ang?
3 Jehova Chakna Chu Rinchhan Rawh: Mika chuan hna thawh tûr huphurhawm tak dawng mah se, chakna pe tûrin Jehova a beisei tlat a. (Mik. 3:8) Jehova chuan a chakna min pêk kan mamawh tih a hria a, chuvângin Bible chuan a chakna dîl tûrin min fuih a ni. An theocratic mawhphurhnate an hlen chhuah theih nân, ani chuan chau hnênahte chuan a thiltihtheihna phal takin a pe a ni. (Sâm 84:5, 7; Is. 40:28-31) Pathian rawng i bâwl chhûng hian a thiltihtheihna chu a mi malin i tawng tawh em? A thlarau thianghlim thiltihtheihnaa ṭanpui tûr chein Jehova hnênah i dîl ṭhîn em?—Lk. 11:13.
4. Mika nun kawng chuan kan tân entawn tûr ṭha eng nge min pêk?
4 A dam chhûng zawngin, Mika chuan a nunah Pathian duhzâwng tih chu a dah pawimawh ber a. Mi nun chhe takte hual vêlin awm mah se, ani chuan rinawmna vawn chu a tum tlat a ni. Chutiang bawkin, kan rinawmna chu nî tina fiahin a awm a. Chuvângin, ‘Jehova kan Pathian chu kumkhuaa biak’ kan tumna chu i tinghet sauh vang u.—Mik. 4:5.