Thawh Nasat Lehzual I Duh Em?
1 Isua chuan Lalram chu ro hlu tak nên a tehkhin a. (Mt. 13:44-46) Chu Lalram chanchin thehdarhna hna pawh chu ro hlu tak a ni. Chuvângin, he rawngbâwlnaa tel kim tûr hian mahni inphat hial pawh ngai mah se, chu chuan kan nunah hmun pawimawh ber a phu a ni. (Mt. 6:19-21) Lalram rawngbâwlnaa thawh nasat lehzual chu i duh em?
2 Hêng Thil Pawimawh Takte Hi Ngaihtuah Rawh: Kan mi mal rawngbâwlna zauh tûr chuan thil pawimawh engemaw zât a awm a. Chûngte chu: (1) nuna Lalram dah pawimawh ber tum tlat te (Mt. 6:33); (2) Jehova rinna lantîr leh amah rinchhan te (2 Kor. 4:1, 7); (3) tih tak zeta ṭawngṭai fan fana Pathian ṭanpuina dîl te (Lk. 11:8-10); (4) kan ṭawngṭainate mila thiltih te a ni.—Jak. 2:14, 17.
3 Kan Rawngbâwlna Zauh Dân Kawngte: Rawngbâwlnaah thla tina hun engemaw zât hmang tûrin thiltum kan insiam ṭheuh thei a. Mahse, tawnchawpa thu hrilh theihna hun remchâng apiang hman ṭangkai te, awmze nei zâwka thusawi te, thiam lehzuala tlawhkîrna neih te, leh in lama Bible zirna hmasâwn tak neih te chu i tum bawk em? Auxialiary pioneer emaw, regular pioneer emaw i thawk theiin, mamawh zualna hmunah rawng i bâwl thei ang em? Baptisma chang tawh unaupa i nih chuan kohhranho rawngbâwltu emaw upa emaw i ni chho thei ang em? (1 Tim. 3:1, 10) Bethel rawngbâwlna te, Nupui Nei Lo Unaupate Tâna Bible School te, Kristian Nupate Tâna Bible School te kal dîlin, i rawngbâwlna chu i zauh thei ang em?—Lk. 10:2.
4 Hna nghet nei a, infiamna lama inhmang tak unaupa pakhat chu regular pioner thawk tûra fuih a ni a. Tichuan, auxiliary pioneer thawk ṭanin, hun bikima rawngbâwl tûrin a dinhmun a siam rem a ni. Chu mi hnu chuan (tûna Nupui Nei Lo Unaupate Tâna Bible School ni tawh) Ministerial Training School-ah a lût a, chu chuan tûna a chanvo chelh mêk bial kantu hna hi thawk thei tûrin a buatsaih a ni. A fuihna dawn a chhân lêt avângin a lâwm hle a, a rawngbâwlna zauh tûra a thu tlûkna siam avângin a hlim zâwk a ni tih a hria a ni.
5 Jehova chuan a rawng bâwl tûra inpete chu mal a sâwm ṭhîn. (Is. 6:8) I rawngbâwlna zauh a, lungawina leh hahdamna nasa zâwk i neihna tûr chu engmahin dang che suh se.