Unaupa Ṭhalaite U, Ṭan In La Em?
1. Eng hunah nge unaupa la naupang deuh chuan 1 Timothea 3:1-a kawhhmuh thu hi a hman ṭan theih ang?
1 “Tupawh kohhran hotua ṭan duh chuan hnathawh ṭha a duh a ni.” (1 Tim. 3:1) Hêng thlarauva thâwk khum thute hian unaupate chu kohhrana rawngbâwlna chanvo chang tûrin a fuih a. Chutiang chanvo chang tûr chuan puitling i nih kher a ngai em? I naupan lai aṭanga ṭan i lâk chu a ṭha ber a ni. Chutiang chuan zirtîrna i dawng thei ang a, i lo upat deuh hunah chuan kohhranho rawngbâwltua ruat theih tûrin i tling tih i lantîr thei dâwn a ni. (1 Tim. 3:10) Baptisma chang tawh unaupa la naupang deuh i nih chuan, engtin nge ṭan i lâk ang?
2. Engtin nge mahni inpêkna rilru put hmang chu neih leh lantîr theih a nih?
2 Mahni Inpêkna: Nihna lam ni lovin, hnathawh ṭha i duh tih hre reng rawh. Chuvângin, unaute ṭanpui duhna nei ang che. Chutianga tih theih dân kawng khat chu Isua entawn tûr siam ṭha tak chu ngun taka chhût hi a ni. (Mt. 20:28; Joh. 4:6, 7; 13:4, 5) Mi dangte ngaihsak mi ni tûra ṭanpui tûr chein Jehova dîl ang che. (1 Kor. 10:24) Kohhrana tarte emaw, hrisêl lote emaw chu an mamawh tak ṭanpuina i pe thei ang em? Kingdom Hall tihfainaah leh a enkawlnaah i inpe thei ang em? Theocratic Rawngbâwlna School-a chanvo chang tûrte an remchân loh hunah an ai i awh thei ang em? Mi dangte tâna i inpêkna chuan hlimna a pe ang che.—Tirh. 20:35.
3. Thlarau mi tak nih chu engtianga pawimawh nge ni a, engtin nge nih theih a nih?
3 Thlarau Lam Dinhmun: Kohhrana rawngbâwltu tân chuan theihna bîk tak emaw, thiamna bîk tak emaw neih ai pawhin thlarau mi nih chu a pawimawh zâwk daih a ni. Thlarau lam thil ngai pawimawhtu chuan Jehova leh Isua anga thil thlîr a tum ṭhîn a. (1 Kor. 2:15, 16 ) “Thlarau rah” a lantîr a ni. (Gal. 5:22, 23) Lalram zawng hmasa a, chanchin ṭha hriltu ṭhahnemngai tak a ni bawk. (Mt. 6:33) Mi mala inzirna hun duan ṭha tak neiin thlarau lam miziate chu i nei chho thei a ni. Chutah chuan nî tina Bible chhiar ziahna te, Vênnainsâng leh Awake! chhuak thar apiang chhiar ziah te, leh kohhran inkhâwm atâna inbuatsaih a, tel ziahna a tel a ni. (Sâm 1:1, 2; Heb. 10:24, 25) Paula chuan tlangvâl Timothea chu thlarau lama hmasâwn tûra a fuih khân: “I zirtîrnaah chuan fîmkhur la,” tiin a ziak a ni. (1 Tim. 4:15, 16) Chuvângin, Theocratic Rawngbâwlna School-a chanvo i neih chu theih tâwpa ṭhain tih tum ang che. Rawngbâwlna atân inbuatsaih la, chhuak ziah bawk ang che. Pioneer thawh te, Bethel-a rawngbâwl te, a nih loh leh Nupui Nei Lo Unaupate Tâna Bible School kal ang chi thlarau lam thiltumte insiam la, tlin ngei tum rawh. Thlarau mi tak i nihna chuan “tleirâwl châknate chu tlânsan” tûrin a ṭanpui ang che.—2 Tim. 2:22.
4. Rintlâkna leh rinawmna hlutna chu eng nge?
4 Rintlâkna leh Rinawmna: Kum zabi khatnaa Kristian ṭanpui ngaite hnêna chaw sem tûra ruatte chu an rintlâk leh rinawm avânga hriat hlawh, “mi hmingṭha” an ni a, an hna an thawh zawh leh zawh lohah tirhkohte rilru chu a hah a ngai lo a. Anni chuan thil pawimawh dangte an ngaihsak theih phah a ni. (Tirh. 6:1-4) Chuvângin, kohhrana chanvo pêk i nih hunah chuan i theih tâwpa ṭhain ti ang che. Lawng tuk tûra kaihhruaina a dawn fîmkhur taka zâwmtu Nova chu entawn rawh. (Gen. 6:22) Jehova chuan rinawmna chu a ngaihlu hle a, chu chuan thlarau lama puitlinna a târ lang a ni.—1 Kor. 4:2; “Zirtîrna Dawn A Hlâwknate” tih bâwm chu en rawh.
5. Engvângin nge unaupa ṭhalaite chuan ṭan an lâk ang?
5 Hrilh lâwk a nih angin, Jehova chuan lâk khâwm hna chu a tichak chho hle a. (Is. 60:22) Kum tin hian a chawhrualin, mi 2,50,000 laiin baptisma an chang a ni. Thutakah mi tam tak an lo luh avângin, kohhrana mawhphurhnate chelh tûr chuan thlarau lama mi tling tak unaupate mamawh a ni a. Jehova rawngbâwlnaah tûn hma aiin hna thawh tûr a tam lehzual a ni. (1 Kor. 15:38) Unaupa ṭhalaite u, ṭan in la em? Ṭan in la a nih chuan, hna ṭha thawh in duh ngei tihna a ni!
[Phêk 5-naa thu lâk chhuah]
Thutakah mi tam tak an lo luh avângin, kohhrana mawhphurhnate chelh tûr chuan thlarau lama mi tling tak unaupate mamawh a ni
[Phêk 6-naa bâwm]
Zirtîrna Dawn A Hlâwknate
Upate’n unaupa nih tling tak ṭhalaite chanvo an han pêk a, an han zirtîr hian anni chuan an hlâwkpui hle ṭhîn a ni. Bial kantu pakhat chuan inkhâwm bânah platform-a ṭhuin thuchhuahtu pakhat chu a fuih a. A bul hnaia lo ding mipa naupang a hmuh chuan amah biak tuma nghâk a nih leh nih loh a zâwt a ni. Chu naupang chuan inkhâwm zawh apianga stage tifai tûra chanvo pêk a nih thu a hrilh a. A nu leh pate chuan haw tum tawh mahse, a chanvo a tih zawh hma chuan haw a duh lo a ni. Bial kantu chu phûr takin a insawn a. Ani chuan heti hian a sawi a ni: “Chu kohhrana upate chuan unaupa nih tling tak ṭhalaite chu kohhrana chanvote pein, an zirtîr ṭhîn a. Chutianga an tih avâng chuan chu kohhran ka tlawh laia unaupa naupang tak kohhran rawngbâwltu ni tûra rawtna an siam pawh chu thil âwm tak a ni,” tiin.