Engin Nge Thu Hril Tûra Min Chêttîr?
1. Hmangaihna leh kan rawngbâwlna inlaichînna chu eng nge ni?
1 Pathian Ram chanchin ṭha hrilh chu tûn laia kan thawh theih hna awmze nei ber a ni a. Dik takin, he hna pakhat thawhna hmang hian thupêk ropui ber pahnih, Jehova hmangaih tûr leh kan vêngte hmangaih tûr tih chu kan zawmzia kan târ lang a ni. (Mk. 12:29-31) Hmangaihna chu rawngbâwltu ṭhahnemngai tak ni tûra min chêttîrtu thiltithei tak a ni.—1 Joh. 5:3.
2. Engtin nge kan thu hrilhna chuan Jehova kan hmangaihna a târ lan?
2 Jehova Hmangaihna: Kan Ṭhian duh tak, Jehova kan hmangaihna chuan amah ṭan tûrin min chêttîr a. Kum 6,000 vêl aṭang tawh khân Setana sawichhiat a ni a. (2 Kor. 4:3, 4) Chuvângin, mite chuan Pathianin mi sualte chu hremhmun mei dîlah a hrem a, ani chu hriatthiam thei loh Trinity ang, leh mihringte ngaihsak lo angah an ring a ni. Mi tam tak chuan a awm lo niin thutâwp an siam hial a. Mite’n kan Pa vâna mi chungchâng thutak an hriat chu kan va duh tak êm! Pathian thuhretu ni tûra taima taka kan thawhrimna chuan amah chu nasa takin a tilâwm a, Setana a tibeidawng thung a ni.—Thuf. 27:11; Heb. 13:15, 16.
3. Eng kawngin nge kan rawngbâwlna chuan vêngte hmangaihna a lantîr?
3 Vêngte Hmangaihna: Mi tuemaw hnêna thu kan hrilh apiang hian, amah chu kan hmangaih tih kan lantîr a. Hêng hun khirh takahte hian mite chuan chanchin ṭha an hriat a ngai tak zet a ni. Mi tam takte chu Jona hun laia Ninevi khua mite ang bawkin, “an ding leh vei pawh thliar thei lote” an ni a. (Jon. 4:11) Kan rawngbâwlna chuan mite chu nun hlim leh hlawhtling neih dân a zirtîr a ni. (Is. 48:17-19) Chu chuan beiseina a pe bawk a. (Rom 15:4) An thil zirte an ngaihthlâk a, an nunpui chuan “chhandamin an awm ang.”—Rom 10:13, 14.
4. Jehova chuan eng nge a theihnghilh ngai loh?
4 Fa fel takte chuan an nu leh pate an hmangaihna chu hun duan bîkah chauh an lantîr lo va. Englai pawha hmangaih rêng chu an tum tlat zâwk a ni. Chutiang bawkin, Pathian leh vêngte kan hmangaihna nasa tak chuan thu hril tûra hun duan chhûng chauh ni lovin, thu hrilh theihna remchângte dap reng tûrin min chêttîr ang a. Bâng lovin thu kan hril ang. (Tirh. 5:42) Jehova chuan chutiang hmangaihna chu a theihnghilh ngai lo vang.—Heb. 6:10.