Pathian Chawimawitu Nungchang
1. Jehova Thuhretute chu district inkhâwmpuia an tel hian, engvângin nge an lansarh hle ṭhin?
1 District inkhâwmpuia kan tel hian, kan langsâr hle ṭhîn a. Inkhâwmpuina hmun khawpui tam takah chuan tualchhûng chanchin tharte’n inkhâwmpui kan neih tûr thu mipuite a hriattîr ṭhîn a ni. Restaurant-ah te chuan mi khual an tam ṭhin avângin a bul vêla chêngte chuan mi khual tam tak inkhâwmpui badge bel an hmu ṭhîn a ni. A hnuaia hriattîrna ṭhenkhatte hian inkhâwmpuina hmuna kan awm laiin kan nungchanga Pathian chawimawi tûrin min ṭanpui ang.—1 Pet. 2:12.
2. Inkhâwmpuina khawpuia kan awm laia silhfên inâwm tak kan inbelna chuan engtin nge Pathian a chawimawi theih ang?
2 Silhfên Inâwm Tak: Inkhâwmnaa silhfên inâwm tak kan inbelna chuan lo thlîrtute rilru a khawih ṭhîn. Restaurant-a thil kan ei lai te, kan bazâr lai te, leh thil dang kan tih laitea kan silhfên inbelte chuan lo thlîrtute rilru a khawih lehzual thei a. Thil dang kan tih hunah silhfên inbel bîk kan neih kher ngai lo mah se kan silhfên inbel chu inâwm tak, zahawm tak, leh duhdah lutuk lo a ni tûr a ni. Lo thlîrtute chuan ringlotute laka kan danglamna an hmu thei tûr a ni a. (Rom 12:2) Badge chuan mite hnênah inkhâwmpui kan nei tih a hriattîrin, thu hrilh theihna hun remchâng a thlen thei a, inkhâwmpui tûra lo kal mi dangte kan hriat theih phah bawk dâwn avângin kan bel tûr a ni.
3. Engtin nge dawhtheihna leh hawihhâwmna kan lantîr theih?
3 Dawhtheihna leh Hawihhâwmna: Khawvêla mi tam takte chu mahni hmasial leh lâwm nachang hre lo an nih laiin, kan dawhtheihna leh hawihhâwmna chu min lo thlîrtu, hotel leh restaurant-a thawkte tân chuan a va hahdam thlâk dâwn êm! (2 Tim. 3:1-5) Ṭhutna kan hauh hunah leh inkhâwmpuia tih chhuah kan thu leh hlate la tûra kan intlar hunah pawh mahni mai ni lovin, mi dangte kan ngaihtuah tel tûr a ni. (1 Kor. 10:23, 24) Tuina nei pa pakhat chuan inkhâwmpuia a tel hmasak ber ṭum chu heti hian a sawi: “Chumi nia thusawi chu engmah ka hre tawh lova; mahse, Thuhretute nungchang chuan keimahah nghawng a nei thui hle a ni,” tiin.
4. Kan theih chuan inkhâwmpui neihna hmuna inpêk chu engvângin nge kan tum ang?
4 Tlâwmngaia Inpêkna: Inpêkna rilru put hmang hi Kristian dik chhinchhiahna a ni. (Sâm 110:3) Inkhâwmpuina hmunah ṭanpui tûrin i inpe thei ang em? Inkhâwmpuina hmun pakhatah chuan unau 600 vêl chu inkhâwmpui hmain a hmun tifai tûrin an inpe a. Chumi hmun enkawltu pakhat chuan: “Kan thil hmuh tawh azâwnga mak ber a la ni! Hêng mi zawng zawngte an inpe hi rin harsa tak a ni,” tiin a sawi chhuak a ni. Kum 2013 district inkhâwmpui chu kan nghâkhlel hle a; Pathian hnên aṭanga thu ngaihthlâk leh zir bâkah, amah chawimawi hlân chu kan nghâkhlel hle a ni.
[Phêk 3-naa bâwm]
Kum 2013 District Inkhâwmpui Hriattîrnate
◼ Inkhâwm Hun: Inkhâwmpuina hmun chu zîng dâr 8:00-ah hawn a ni ang a. Inkhâwmpui chhûng hian 9:20-ah rimawi a inṭan ang. Chutih hunah chuan zahawm taka ṭan a nih theih nân mahni ṭhutna tûr hmunah kan ṭhu ṭheuh tûr a ni. Inrinni chuan inkhâwm bânna hla leh ṭawngṭaina chu tlai 4:50-ah neih a ni ang a, Chawlhni-ah erawh chuan tlai dâr 3:35-a neih a ni thung ang.
◼ Lîrthei Dahna: Lîrthei dah dân chunga thu kan neih theihna inkhâwmpuina hmunahte chuan, a lo thleng hmasa apiang hnênah dah man chawi lova hmun chantîr a ni ang. Lîrthei dahna hmun hi a zau vak ṭhin loh avângin, lîrthei pakhatah a theih anga tam chuanho hrâm tûr a ni. Ramtuileilote lîrthei chauh chu an tâna hmun hauhah dah phal a ni ang.
◼ Ṭhutna Hauh: Ṭhutna chu motor-a i chuanpuite emaw, in khata i chênpuite emaw, a nih loh leh i Bible zirpuite tân chauh hauhsak theih a ni ang. Tarte leh dam lote tâna ṭhutna hmun chu a tam vak ṭhin loh avângin, chhûngkuaa mite’n an ṭhutpui vek thei lo vang. Chûng ṭhutnate chu tarte leh dam lote leh anmahni enkawltute tân dah ang che.—1 Kor. 13:5.
◼ Chhûn Chaw: Chhûn chawlh chhûnga inkhâwmpuina hmun kalsan ai chuan, chhûn chaw samkhai tak rawn keng ang che u.
◼ Thawhlâwm: District inkhâwmpui ruahmanna avânga kan lâwmzia chu khawvêl pum huap rawngbâwlna atâna thawhlâwm bâwmah phal taka thawhin kan lantîr thei a. Inkhâwmpuinaa cheque hmanga thawhlâwm thawhte chu “The Watch Tower Bible and Tract Society of India” hminga dawn theih tûra siam tûr a ni.
◼ Inenkawl Mêkte: Inenkawl mêk i nih chuan, inkhâwmpuinaah damdawi hmuh theih a nih dâwn loh avângin i mamawh tûr âwm tâwk rawn keng la. Zunthlum veite inchiuna syringe-te chu inkhâwmpuina hmun leh hotel-a bawlhhlawh paihna pângngaiah ni lovin, bawlhhlawh hlauhawm dah khâwmna bîkah paih tûr a ni.
◼ Pheikhawk: Kum tinin pheikhawk leh a kaihhnawih thil avânga intihpalhna a thleng deuh nual ṭhîn a. Kailâwn leh hmun danga him taka i kalpui theih tûr i bun tâwk leh mawihnai tak bun chu a ṭha ber a ni.
◼ Bengngawngte Tân: Inkhâwmpui ṭhenkhatah chuan thusawite chu sign language-a neih a ni bawk ang.
◼ Rimtui Inhnawih Chite: Inkhâwmpui tam tak chu khâwl hmanga boruak fîm lak luhna hmun inkhâr ûp taka neih a ni a. Chuvângin, thâwk lam pang leh a kaihhnawih lam thila harsatna neite’n buaina an tawh loh nân rimtui inhnawih chi rim na lutuk hman loh chu ngilneihna lantîrna a ni ang.—1 Kor. 10:24.
◼ Follow Up (S-43) Form: Please Follow Up form chu inkhâwmpui chhûnga tawnchawpa thu hrilhna kan neih aṭanga tuina lantîrtute chungchâng hriattîrna ziak nâna hman tûr a ni. Form kimchang taka ziak khah chu Book Room-ah emaw, i haw hunah i kohhran secretary hnênah emaw i theh lût thei ang.
◼ Restaurant-ah: Restaurant-ah chuan i nungchang mawi hmangin Pathian Jehova hming chawimawi la. Kristian rawngbâwltute nêna inchawih takin inthuam rawh. Tih ṭhin dân a nih chuan, lâwm thu sawi nân lâwmman tlêm azâwng (tips) hnutchhiah ang che.
◼ Hotel-ah:
(1) Mamawh zât tûr aia tam pindan la lo la, an phal zât aia tam khawsa suh u.
(2) Rîkrum thil vâng a nih loh chuan i pindan hauh lâwk tawh chu cancel lo la; chutiang thil a thleng a nih chuan mi dang pindan mamawhte’n an luah theih nân hriattîr vat ang che. (Mt. 5:37) I cancel a ngaih chuan, cancel-na number chu dîl rawh. I room hauh tawh chu i luah hma dârkâr 48-a i cancel loh chuan i sum pêk tawh chu i hmu kîr leh thei lo ang.
(3) Hotel-a i luh hunah debit card leh credit card i hmang a nih chuan, i account aṭanga i pindan luah man bâkah, i châm chhûnga thil tihchhiat palh awm theite phuhru thei tûr khawp sum hrên a ni ṭhîn. Chûng i hman tak tak bâk an hrênte chu hotel i chhuahsan hnua bank lama tihfel a nih hma loh zawng i hmang thei lo vang.
(4) Hman i inpeih hunah chauh bungraw nawrna nawrlirh chu la la, i hman zawhah dah lehnghâl ṭhîn rawh.
(5) In awmna ram atân tih ṭhin dân a nih chuan hotel hnathawktute’n i bungrua an dah felsak hunah che lâwmman pe la, in chhûng tifaitu tân nî tin sum tlêm azâwng lâwmthu sawi nân hnutchhiah rawh.
(6) A theih lohna hmunah ei rawng bâwl suh.
(7) Hotel-a thlengte tâna athlâwna an pêk zîng chaw, coffee, a nih loh leh vûr te chu mi dang tân la suh.
(8) Hotel-a thawkte nêna in indâwrnaah thlarau rah lantîr rawh. Anni chuan mikhual tam tak an enkawl ṭhîn a, kan ngilneihna, dawhtheihna, leh remhriatna chu an hlut a ni.
(9) Nu leh pate chuan an fate chu hotel leh a chhehvêla an awm laiin—inkhai chhohnaah te, swimming pool-ah te, innghahkhâwmna hmunah te, exercise lâkna hmunah te, leh hmun dangahte pawh—an veng reng tûr a ni.
(10) Hotel Luah Theih Ziak Chhuahna-a târ lan luah man chu tax pêk tûr tel lovin, ni khat chhûng luah man tûr a ni. Chawi belh tûra tih i nih chuan, pe nghâl mai lo la, inkhâwmpuinaa Rooming Department hriattîr vat ang che.
(11) I thlenna hotel room chungchânga buaina i neih chuan, inkhâwmpuinaa i awm chhûng ngeiin Rooming Department hriattîr la, an ṭanpui thei ang che.
◼ Tlâwmngaia Rawngbâwlna: Inkhâwmpuina hmuna a ṭûlna apianga ṭanpui duhte chuan Volunteer Service Department-ah inhriattîr tûr a ni. Kum 16 hnuai lam naupangte pawhin an nu leh pa emaw, enkawltu emaw, a nih loh leh anni’n an ruat puitling pakhat emaw enkawlna hnuaiah thawkin ṭanpuina hlu tak an pe ve thei a ni.