Mite Biak Ṭan Dân Sâwt Tak Chu Hmang Rawh
1. Kristian hmasate’n mite biak ṭan dân chi hrang hrang an hman dân aṭangin eng nge kan zir theih?
1 Kristian hmasate chuan hnam hrang leh sakhaw hrang hrang vuantute hnênah chanchin ṭha an hril ṭhîn a. (Kol. 1:23) An thuchah ken chu thu thuhmun—Pathian Ram chanchin—ni mah se, an thu ngaithlatute azirin mite an biak ṭan dân erawh a inang lo. Entîr nân, Petera chuan Pathian Lehkha Thu zahna thûk tak nei Judahote a biak khân zâwlnei Joela thusawi chu la chhâwngin a sawi ṭan mai a. (Tirh. 2:14-17) Kawng lehlamah chuan Tirhkohte 17:22-31-a kan hmuh Paula’n Grik mite a chhûtpui dân hi han ngaihtuah teh. Tûn laiah pawh, bial ṭhenkhata mite chuan Bible zahna an nei a, in tin kan kal hunah duh tâwkin Bible kan hmang thei a. Mahse, Bible emaw, sakhua emawa tuina nei lo, a nih loh leh Kristian ni lo te i biak hunah chuan i fîmkhur deuh a ngai mai thei a ni.
2. Engtin nge thu leh hla pêk chhuah tûr chu Bible ngaihlutu leh ngaihlu lo tute ṭanpui nân kan hman theih ang?
2 Thu Leh Hla Pêk Chhuah Tûrte Chu Hmang Ṭangkai Rawh: Tûn rawngbâwl kum atâna thu leh hla pêk chhuah tûrte chu thla hnih dan zêla thlâk a ni ang a, magazine te, tract te, leh brochure te hman a ni ang. Kan thawhna biala mite’n Bible lam an ngaihven lo a nih pawhin, an tuizâwng thu ziak chuanna thu leh hla engemaw tak chu kan pe thei tho dâwn a ni. Kan tlawh hmasak ber ṭuma Bible kan chhiarsak thei lo emaw, Bible kan kawhhmuh thei lo emaw pawh a ni thei; mahse, tuina lantîr a nih phawt chuan Siamtu leh a thâwk khum Thu-a rinna neih tûra ṭanpui tum rân chungin kan tlawhkîr thei a ni. Amaherawhchu, mite’n Bible an ngaihhlutna hmuna thu kan hrilh chuan, thu leh hlate chu kan pein, chu mi mil chuan mi kan be ṭan thei a ni. A nihna takah chuan, thla tina sem chhuah tûr chu eng pawh ni se, Bible Zirtîrna tih bu emaw, Pathian Thu Ngaithla Rawh tih brochure emaw, Pathian Thu Ngaithlain Chatuanin Nung Rawh tih brochure emaw chu engtik lai pawhin kan sem chhuak thei a ni. A pawimawh ber chu mite biak ṭan dân sâwt tak hman a ni.
3. Eng kawngin nge kan biala mite thinlung chu lei ang a nih?
3 A Lei Chu Buatsaih Rawh: Mihring thinlung hi lei ang a ni a. (Lk. 8:15) Lei ṭhenkhat chu Bible thutak chiin zung a kaih a, a ṭhan theih nân buatsaih lehzual a ngai a ni. Kum zabi khatnaa chanchin ṭha hriltute chuan lei chi tinrêngah hlawhtling takin thutak chi chu an tuh a, chu chuan lungawina leh hlimna a pe a ni. (Tirh. 13:48, 52) Keini pawhin mite kan biak ṭan dân tûr ngun taka kan ngaihtuah chuan anni angin kan hlawhtling ve ngei ang.