Zirtîr Dân I Thiam Lehzual Nâna Rawtna Pathum
1. Engvângin nge zirtîr dân thiam lehzual chu kan tum ang?
1 Kristian rawngbâwltu zawng zawngte chu zirtîrtu an ni vek a. Mite kan va tlawh emaw, an tuina chawktho tûrin kan tlawhkîr emaw, a nih loh leh Bible kan zirpui emaw pawh ni se, chanchin engemaw kan hrilh hria tihna a ni a. Chu kan chanchin hrilh chu chanchin narân mai a ni lo. ‘Chhandamna hmu khawpa tifing thei Lehkha thianghlimte’ chungchâng chanchin a ni. (2 Tim. 3:14, 15) Chanvo ropui tak a va ni êm! Tûnah chuan, zirtîr dân thiam lehzual nân rawtna pathum kan rawn chhawp chhuak dâwn a ni.
2. Engtin nge hriatthiam awlsam taka kan zirtîr theih?
2 Hriatthiam Awlsam Tak: Thu engemaw kan hriat chian hle hian, a hre ve lote tâna hriat thiam a harsat dân tûr theihnghilh mai chu a awlsam ṭhîn. Chuvângin, Bible i zirpui hunah thil ṭûl lêm lote chu sawi tel chiam suh. Chu ai mahin, a pawimawh lai chauh sawi lang zâwk ang che. Thu sawi tam nazawng hi zirtîrna ṭha a ni kher lo. (Thuf. 10:19) A tlângpuiin, Bible châng pawimawh laite chauh chhiar hi a ṭha ber a. Bible châng pakhat i chhiar hnuah, in sawiho lai thu nêna a inkûngkaih lai chauh hrilhfiah ang che. Matthaia bung 5 aṭanga 7-a chhinchhiah Tlâng Chunga Thusawiah khân thu ril tak takte a tel a; mahse, Isua chuan hriatthiam awlsam taka zirtîrin, a ṭawng tui tam duah lo a ni.
3. Tehkhin thu a hlut chhan chu eng nge ni a, eng nge a ṭhat berna chu?
3 Tehkhin Thute: Tehkhin thute chuan ngaihtuahna a chawk thovin, rilru a chawk phûr a, thilte hre reng tûrin min ṭanpui bawk a ni. Tehkhin thu ṭha tak sawi tûr chuan tîtî thiam tak i nih kher a ngaih ring suh. Isua chuan tehkhin thu tâwi leh hriatthiam awlsam tak a hmang fo a ni. (Mt. 7:3-5; 18:2-4) Lehkha phêka milem mâwl mang tak thai mai maia hrilhfiah pawh hi a ṭangkai hle thei bawk. Tlêma i ngaihtuah lâwk chuan, tehkhin thu ṭha tak tak hman tûr chu i hre chhuak thei dâwn a ni.
4. Engtin nge zawhnate ṭangkai taka kan hman theih?
4 Zawhnate: Zawhna i zawh hian zirlai tân ngaihtuahna hman a ngai a. Chuvângin, zawhna i zawh hnuah dawhthei takin nghâk deuh rawh. Mahnia a chhânna i pêk nghâl mai chuan, i zirpui hriatthiam dân dik tak chu i hre thei lo vang. A chhân dik loh chuan, a dik hrilh mai aiin zawhna dang zawh belha chhânna dik hre tûra ṭanpui chu a ṭha zâwk thei a ni. (Mt. 17:24-27) Dik tak chuan, zirtîrtu ṭha famkim kan ni lo va. Chuvângin, Bible chuan kan zirtîrnaah fimkhûr reng tûrin min fuih a ni. Chutianga kan tihna chuan kan tân leh kan thu ngaithlatute tân chatuan hlâwkna a thlen ang.—1 Tim. 4:16.