Kan Chawlhsan Ngai Lo
1. Engtin nge kum zabi khatnaa thu hriltute’n an thu hrilhna chawlhsan tûrah an inngai lo tih kan hriat theih?
1 Kum zabi khatnaa thu hriltu ṭhahnemngai takte chuan mite an hmuh theihna apiangah ‘bâng lovin’ chanchin ṭha an hril a. (Tirh. 5:42) Chuvângin, in tin kal paha kawnga an mi tawhte chu thu hrilh lova an kal pelh mai a rinawm lo hle. Thlawhhma rawngbâwlna an zawh hnua an bazâr-naah te pawh tawn chawpa thu hrilh theihna hun remchâng an neih chu an hmang ṭangkai ngei bawk ang. Isua angin, anni chuan thu hrilh rawngbâwlna chu chawlhsan tûrah an inngai lo a ni.—Mk. 6:31-34.
2. Kan hming phua nunnaah eng thilte nge tel?
2 Inpeih Reng Rawh: Jehova Thuhretute tih kan hming put chuan kan thiltih mai ni lovin, kan nihna a târ lang a. (Is. 43:10-12) Chuvângin, in tina kan kal loh lai pawhin kan beiseina chungchâng sawifiah tûrin kan inpeih reng a ni. (1 Pet. 3:15) Tawn chawpa thu hrilh theih dân tûr hun remchâng ngaihtuahin, chuta i thusawi dân tûrte i ngaihtuah lâwk ngai em? Tuina lantîrtute hnêna sem chhuah tûr thu leh hla chhuah i kawl em? (Thuf. 21:5) In tinah chauh nge chanchin ṭha i hrilh ṭhin a, dinhmunin a zir phawt chuan hmun dangahte pawh i hril ṭhîn zâwk?
3. Engvângin nge kawtthlêr te, bus chawlh hmun te, motor park-na te, vântlâng lênvahna park te, hna thawhna hmun te, rêl station te, leh hmun dang dang te-a thu hrilhna chu sawi nêp tûr a nih loh?
3 Vântlâng Hmuna Thu Hrilhna: Kawtthlêr-ah te, bus chawlh hmunah te, motor park-na hmunah te, vântlang lênvahna park-ah te, mite hna thawhna hmunah te, rêl station-ah te, leh hmun dang dangahte thu kan hril ṭhîn a. Chûng chu tih dân pângngai piah lama thu hril tûra ṭan lâkna, a nih loh leh duh leh duh loh a zir mai a ni em? Tirhkoh Paula chuan “vântlâng zîngah” leh “in tinah” thu a hrilh ṭhin thu a sawi a. (Tirh. 20:20) In tin kala rawngbâwl chu mite hnêna Lalram thuchah kan thlen theih dân kawng bul ber leh ṭangkai ber a la ni zêl a ni. Mahse, kum zabi khatnaa thu hriltute chuan mite chênna in ni lovin, a mihringte an ngai pawimawh zâwk a. Vântlâng zîngah te, tawn chawp te,a leh in tinah te thu hrilh theihna hun remchâng an neih apiang chu an hmang ṭangkai a ni. Kan rawngbâwlna kan hlen chhuah theih nân chutiang rilru put hmang chu i nei ve ang u.—2 Tim. 4:5.
[Footnote]
a Tawn chawpa thu hrilh chu vântlâng hmuna thu hrilh nên hriat pawlh tûr a ni lo. Chu chu kan nî tin thiltiha kan hmuhte hnêna chanchin ṭha hrilhna hi a ni.