Jehova Hnên Aṭangin I Zir Theih Apiang I Zir Em?

1. Zirna chungchânga Jehova ngaih dân chu eng nge ni?

¹ Kan “Zirtîrtu Ropui” Jehova chuan inzir thiam tûrin min duh a. (Is. 30:20, NW) A Fapa hmasa ber a siam zawh aṭang khân zirtîrna chu a ṭan nghâl a ni. (Joh. 8:28) Adama a hel hnuah pawh Jehova chuan a zirtîrna chu a tâwp san mai lo va, hmangaihna nei takin mihring ṭha famkim lote chu kaihhruaina a la pe zêl zâwk a ni.—Is. 48:17, 18; 2 Tim. 3:14, 15.

2. Eng zirtîrna beihpui nge tûn laiah thlâk mêk a nih?

² Tûn laiah pawh, Jehova chuan mihring chanchina zirtîrna beihpui ropui ber chu a la kaihhruai reng a. Zâwlnei Isaia hrilh lâwk angin, khawvêl puma mi maktaduai têlte chu entîr nei “LALPA in awmna tlâng” lam panin an kal nguah nguah a ni. (Is. 2:2) Engvângin nge an kal nguah nguah? Pathian Jehova kawng chanchinte zir tûr—a ni, a zirtîrna dawng tûrin an kal a ni! (Is. 2:3) Kum 2010 rawngbâwl kum chhûng khân, Jehova Thuhretute chuan mite hnêna thu hrilh nân leh Bible thutak zirtîr nân dârkâr tlûklehdingâwn 1.6 chuang an hmang a. Chu bâkah, khawvêl puma Thuhretute kohhran 1,05,000 aia tamah chawlhkâr tinin thlarau lam zirtîrna pêk a ni bawk a, bâwih rinawm leh fing pâwl chuan mi dangte zirtîr nân Kristian thu leh hla chhuah chu ṭawng 500 chuang laiin a tichhuak bawk.

3. Engtin nge Jehova zirtîrna chu a mi mal taka i hlâwkpui?

³ Hlâwkpui Hle Rawh: Pathian min zirtîrna chu kan va hlâwkpui tak êm! Pathian chuan hming a nei tih leh ani chuan min ngaihsak tihte kan hriat phah a. (Sâm 83:18; 1 Pet. 5:6, 7) Nuna zawhna pawimawh berte zînga mi: Engvângin nge mite’n hrehawm an tawrh a, an thih ṭhin? Engtin nge hlimna dik tak ka hmuh theih ang? Nun hian eng nge a tum? tih ang chi chhânnate hi kan hriat phah bawk. Jehova chuan ‘kan kawngte min tihtluantîr zêl’ theitu nungchang lama kaihhruaina pawh min pe bawk a ni.—Jos. 1:8.

4. Pathian chhiahhlawhte tân eng zirna ṭhenkhatte nge dawn theih ni a, engvângin nge Jehova hnên aṭanga kan zir theih apiang zir chu kan tum ang?

⁴ Chu bâkah, Jehova chuan a rawngbâwltu tam takte’n an rawngbâwlna an tihzauh lehzual theih nân a bîk taka zirtîrna a ruahman bawk a. Phêk 4-6-naah mi ṭhenkhat tâna dawn theih chûng zirnate chu târ lan a ni. Kan dinhmun avângin hêng zirtîrna târ lante hi dawng thei lo mah ila, kan dawn theihte chu kan hlâwkpui tak zet em? Zirtîrtute leh mi dangte’n khawvêl zirna sâng ûm tûra an fuih ṭhalaite chu thlarau lam thil ûm a, zirna sâng ber—Pathian zirtîrna—ûm zâwk tûrin kan fuih em? Jehova hnên aṭanga kan zir theih ang apiang zirna chuan tûna nun hlimna leh nakina chatuan nunna nei tûrin min ṭanpui ang.—Sâm 119:105; Joh. 17:3.

Jehova Inawpna Pâwl Kal Tlanga Dawn Theih Zirna Ṭhenkhat

Ziak leh Chhiar Zirna

• A Tum: Mite chu mahnia Bible zirna an neih theih nân leh mi dangte thutak an zirtîr theih nâna ziak leh chhiar zirtîr.

• A Rei Zâwng: Mamawh dân azir.

• A Hmun: Tualchhûng Kingdom Hall.

• A Tel Thei Chin: Thuchhuahtu zawng zawng leh thutaka tuina neite.

• A Dîl Dân Tûr: Kohhrana upate chuan tualchhûng mamawh ang zêlin ziak leh chhiar zirna chu an huaihawt ang a, a hlâwkpui thei tûr apiang tel tûrin an fuih ang.

Theocratic Rawngbâwlna School

• A Tum: Chanchin ṭha hriltu leh zirtîrtu thiam tak ni tûra thuchhuahtute zirtîr.

• A Rei Zâwng: Engtik lai pawha neih reng.

• A Hmun: Tualchhûng Kingdom Hall.

• A Tel Thei Chin: Thuchhuahtu zawng zawngte bâkah, inkhâwmnaa tel ziah, Bible zirtîrna pawm a, Kristian dân bulte mila nung bawkte chu an tel thei ang.

• A Dîl Dân Tûr: Theocratic Rawngbâwlna School enkawltu hnêna hrilh.

Ṭawng Dang Zirna Class

• A Tum: Ṭawng danga chanchin ṭha hril thei tûra thuchhuahtute zirtîr.

• A Rei Zâwng: Thla li emaw, thla nga emaw. Inrinni zîng lamah dârkâr khat emaw dârkâr hnih emaw zir a ni tlângpui.

• A Hmun: Kingdom Hall hnai berah a ni tlângpui.

• A Tel Thei Chin: Ṭawng dang hmanna hmuna thu hril duh, thuchhuahtu entawn tlâk takte.

• A Dîl Dân Tûr: Zirna chu a ṭûl dân azirin branch office aṭanga ruahman a ni.

Kingdom Hall Sak

• A Tum: Kingdom Hall sak leh thuam ṭhat. Hei hi school a ni lo va; mahse, he ruahmanna hnuaiah hian mahni thua inpete chu in sakna an puih theih nân thiamna chi hrang hrang zirtîr an ni.

• A Rei Zâwng: Mahni thua inpete dinhmun azir zêl.

• A Hmun: Regional Building Committee-in a ruatna hmun apiangah. Mahni thua inpe ṭhenkhat chu leilung chhiatnain a nghawng, hmun hla zâwka chhawmdâwlna hna ṭanpui tûrin sâwm an ni thei bawk.

• A Tel Thei Chin: Baptisma chang tawh unaute an ni tûr a ni a, upahote pawmpuina nei an ni tûr a ni. Thiamna nei emaw, nei lo emawte pawh an tel thei.

• A Dîl Dân Tûr: Tual chhûng upate hnên aṭangin Application for Kingdom Hall Construction Volunteer Program (A-25) dîl la, ziak khat ang che.

Pioneer Rawngbâwlna School

• A Tum: ‘An rawngbâwlna hlen’ tûra pioneer-te ṭanpui.—2 Tim. 4:5.

• A Rei Zâwng: Thla hnih.

• A Hmun: Branch office-in a ruahmanna hmunah; Kingdom Hall hnai berah a ni tlângpui.

• A Tel Thei Chin: Kum khat tal regular pioneer lo thawk tawh an ni tûr a ni.

• Tel Theih Dân: Pioneer school-a tel thei tûrte chu teltîr nghâl zêl an ni a, an bial kantuin a hriattîr ṭhîn a ni.

Bethel Luhna School

• A Tum: He school hi Bethel-a lo kal tharte’n Bethel rawngbâwlna hlawhtling tak an neih nâna ṭanpuitu tûra ruahman a ni.

• A Rei Zâwng: Chawlhkâr tin dâr kâr khat zêlin chawlhkâr sâwm leh paruk chhûng neih a ni.

• A Hmun: Bethel.

• A Tel Thei Chin: Bethel chhûngkaw zînga awm nghet emaw, (kum khat emaw, a aia tam emaw) chhûng temporary volunteer-te emaw an tel thei ang.

• Tel Theih Dân: A tel thei tûrte chu teltîr nghâl zêl an ni.

Lalram Rawngbâwlna School

• A Tum: Upate leh kohhranho rawngbâwltute chu kohhran leh inawpna pâwla an mawhphurhnate enkawl ṭha lehzual thei tûra zirtîr. (Tirh. 20:28) He school hi Governing Body rêl ang zêla kum engemaw zât dana neih ṭhin a ni.

• A Rei Zâwng: Tûn hnai kumte aṭangin upate tân ni khat leh a chanve a ni a, kohhranho rawngbâwltute tân ni khat a ni.

• A Hmun: Kingdom Hall hnai berah emaw, Assembly Hall hnai berah emaw a ni tlângpui.

• A Tel Thei Chin: Upa emaw, kohhranho rawngbâwltu emaw an ni tûr a ni.

• Tel Theih Dân: Heta tel tûr upate leh kohhranho rawngbâwltute chu bial kantuin a hriattîr ṭhîn.

Kohhran Upate Tâna Schoola

• A Tum: Upate’n kohhrana an mawhphurhnate ṭha taka an hlen chhuah theihna tûra ṭanpui nâna ruahman a ni.

• A Rei Zâwng: Ni nga.

• A Hmun: Branch office rêl ṭhin a ni a; Kingdom Hall hnai berah emaw, Assembly Hall hnai berah emaw neih a ni tlângpui.

• A Tel Thei Chin: Upa an ni tûr a ni.

• Tel Theih Dân: A tel thei tûr upate chuan branch office aṭangin sâwmna an dawng ṭhîn.

Bial Kantute Leh An Nupuite Tâna Schoolb

• A Tum: Bial kantute leh district kantute’n kohhranho rawng ṭha lehzuala an bâwl theihna tûr leh ‘thu hril leh zirtîrnaa thawk rim a,’ an kut hnuaia awmte an enkawl ṭhat lehzual theih nâna ṭanpuitu tûra ruahman a ni.—1 Tim. 5:17; 1 Pet. 5:2, 3.

• A Rei Zâwng: Thla hnih.

• A Hmun: Branch office aṭanga ruat a ni.

• A Tel Thei Chin: Bial kantu emaw, district kantu emaw an ni tûr a ni.

• Tel Theih Dân: Heta tel thei chin bial kantute leh an nupuite chuan branch office aṭangin sâwmna an dawng ṭhîn.

Nupui Nei Lo Unaupate Tâna Bible Schoolc

• A Tum: Kohhrana mawhphurhna neih belh thei tûra nupui nei lo upate leh kohhranho rawngbâwltute buatsaih nân a ni. He school-a zir chhuak a tam zâwkte chu anmahni ram chhûnga mamawh zualna hmunah rawngbâwl tûra tirh an ni ang. An inhuam chuan mi tlêm tête chu ram danga rawngbâwl tûra tirh pawh an ni mai thei.

• A Rei Zâwng: Thla hnih.

• A Hmun: Branch office aṭanga rêl a ni a; Assembly Hall-ah emaw, Kingdom Hall-ah emaw neih a ni tlângpui.

• A Tel Thei Chin: Nupui nei lo unaupa kum 23 aṭanga kum 62 inkâr, hrisêlna ṭha tak nei leh mamawhna hmun apianga unaute leh Lalram tâna rawngbâwl duhna rilru neite chu an tel thei ang. (Mk. 10:29, 30) An nihna kum hnih tal chelh tawh an ni tûr a ni.

• A Dîl Dân Tûr: In branch bial chhûnga he school hi a awm a nih chuan, a dîl duhte kawmna chu bial inkhâwmpui huna neih a ni ang a. Chutah chuan hriat belh ngaite chu hriat theih a ni bawk ang.

Kristian Nupate Tâna Bible Schoold

• A Tum: Jehova leh a inawpna pâwlin a hman ṭangkai lehzual theih nâna nupate a bîka zirtîrna pêk. He school-a zir chhuak a tam zâwkte chu anmahni ram chhûnga mamawh zualna hmunah rawngbâwl tûra tirh an ni ang. An inhuam chuan mi tlêm tête chu ram danga rawngbâwl tûra tirh pawh an ni thei bawk.

• A Rei Zâwng: Thla hnih.

• A Hmun: Atîr lama neih vawi tam vak lo chu Watchtower Educational Center in Patterson, New York, U.S.A-ah neih a ni a. Chu mi hnu chuan, branch office-in a ruatna hmun zêlah neih a ni ta a, Assembly Hall-ah emaw, Kingdom Hall-ah emaw neih a ni tlângpui.

• A Tel Thei Chin: Nupa kum 25 aṭanga kum 50 inkâr mi an ni tûr a ni a, mamawhna hmun apianga rawngbâwl thei dinhmuna ding leh: “Kei heta hi ka awm, mi tîr ta che,” tih rilru put hmang nei, mi hrisêl ṭha tak an ni tûr a ni. (Is. 6:9) Chu bâkah, kum hnih tal innei tawh, kum hnih chhûng tal châwl miah lova hunbi kima rawngbâwl tawh an ni tûr a ni.

• A Dîl Dân Tûr: In branch bialah he school hi a awm a nih chuan, a dîl duhte kawmna chu special inkhâwmpui huna neih a ni ang a. Chutah chuan hriat belh ngaite chu hriat theih a ni bawk ang.

Watchtower Bible School of Gilead

• A Tum: Missionary ni thei tûra pioneer-te leh hunbi kima rawngbâwl mi dangte zirtîr hi a ni.

• A Rei Zâwng: Thla nga.

• A Hmun: Watchtower Educational Center, Patterson, New York, U.S.A.

• A Tel Thei Chin: An baptisma channa kum thum tling tawh nupate tân dîl theih a ni a, dîlna hmasa ber an theh luh lai chuan kum 21 aṭanga kum 38 inkâr mi an ni tûr a ni. Sâpṭawng thiam, kum hnih tal lo innei tawh, leh kum hnih chhûng tal châwl miah lova hunbi kima rawngbâwl tawh an ni tûr a ni. Dîltute chu an hrisêl ṭha tûr a ni a. Ram danga pioneer thawkte (missionary-te pawh tiamin); bial kantute; Bethel chhûngkuaa mite; Ministerial Training School te, Nupui Nei Lo Unaupate Tâna Bible School te, leh Kristian Nupate Tâna Bible School te lo zir chhuak tawhte chu tlin ngaite an tlin chuan an tel thei ang.

• A Dîl Dân Tûr: Branch ṭhenkhatah chuan, he school-a kal duhte kawmna chu district inkhâwmpui laia neih a ni ṭhîn. Chutah chuan hriat belh ngaite chu hriat theih a ni ṭhîn. In inkhâwmpuinaa chutiang kawmna a awm loh va, dîl ve ngei i duh si chuan, hriat chian leh zual nân in branch office-ah lehkha i ziak thei ang.

Branch Committee Member-te Leh An Nupuite Tâna School

• A Tum: Branch Committee-a ṭang mêkte’n Bethel ṭha lehzuala an enkawl theih nân te; an branch enkawlna hnuaia awm kohhran te, bial leh district te khawih thei rawngbâwlna nêna inkûngkaih thilte an ngaihsak theih nân te; leh ṭawng lehlin te, thu leh hla chhut chhuah leh thawn chhuah te, leh department hrang hrangte ṭha lehzuala an enkawl theih nân a ni.—Lk. 12:48b.

• A Rei Zâwng: Thla hnih.

• A Hmun: Watchtower Educational Center, Patterson, New York, U.S.A.

• A Tel Thei Chin: Branch Committee member emaw, Country Committee member emaw, chutiang ni tûra chanvo dawngte emaw an tel thei ang.

• Tel Theih Dân: Heta tel thei unaupate leh an nupuite chuan Governing Body aṭangin sâwmna an dawng ṭhîn.

[Footnote-te]