Chawlhni Rawngbâwlnaah I Tel Thei Em?
1. Philippi khuaa Paula leh a ṭhiante thiltih aṭangin eng nge kan zir theih?
1 A hun chu Philippi khuaa Juda mi tam zâwkte chawlh hahdam hun, Sabbath nî a ni a. Paula leh a ṭhiante chuan missionary-a an zinnaah chu khua chu an tlawh a ni. Chu mi nî chuan an phû ang ngeiin rawngbâwl lovin châwl hahdam mah se, tuman an sawisêl lo vang. Amaherawhchu, Judate chu khaw pâwnah ṭawngṭai tûrin an kal khâwm tih an hria a, chu chu an hnêna thu va hrilh nân an hmang ta zâwk a ni. Ludi leh a chhûngte’n an thusawi ngaithlaa baptisma an han channa chuan Paula leh a ṭhiante chu a va tilâwm dâwn êm! (Tirh. 16:13-15) Tûn laia mi tam takte chu Chawlhni-a an chawlh hahdam ṭhin avângin, engah nge he nîa dârkâr engemaw zât tal chu thu hrilh nân i hman loh vang?
2. Jehova mite chuan Chawlhni-a thu an hrilh theih nân eng harsatnate nge an tâwn tlang?
2 Chawlhni-a Thu Hril Tûra Hma Lâkna: Kum 1927 chhûng khân, Jehova mite chu Chawlhni apianga dârkâr engemaw zât tal rawngbâwl tûra fuih an ni a. Chu chuan dodâlna a tâwk nghâl a ni. United State-ah chuan Chawlhni Sabbath dân bawhchhiat vâng te, remna tihbuai vâng te, leh phalna lova thil zawrh avângtein mi tam tak chu man an ni a. Mahse, Jehova mite chuan thu hrilh an bânsan chuang lo. Kum 1930 chho bâwr vêl khân, “divisional campaigns” an tih thu hrilhna bial pakhat hrût chhuah nâna kohhran hnaivaia awm thuchhuahtute kal khâwma rawngbâwlna chu huaihawt a ni a. Thuchhuahtute man an nih châng hian, an tam êm avângin thuneitute chuan an thu hrilhna chu an titâwp thei chuang lo. Chûng unaute inpêkna chu i hlut tak zetin, an ṭhahnemngaihna entawn chu i duh em?
3. Engin nge Chawlhni hi rawngbâwl nâna ni ṭha tak nihtîr?
3 Thu Hrilh Nâna Ni Ṭha Tak: Mi tam tak chu Chawlhni hian inah an awm hahdam tlângpui ṭhîn a. Kristiana inchhâl mi ṭhenkhat chuan he mi nîa Pathian thu sawihona neih chu an duh zâwk thei a ni. Chawlhni-a inkhâwm ṭhîn kan nih chuan, rawngbâwl nâna inthuamsa ang kan nih avângin, engvângin nge inkhâwm hma emaw, bân hnu emawa thlawhhma rawngbâwlnaa tel chu i tum loh vang? A ṭul chuan, chaw pai tûr insiam ang che.
4. Chawlhni-a dârkâr engemaw zât rawngbâwl nâna kan hman chuan eng ang hlimna nge kan tawn theih?
4 Chawlhni-a dârkâr engemaw zât rawngbâwl nâna kan hman pawhin, kan mamawh chawlh hahdam nân hun kan la nei thei tho vang. Tin, rawngbâwlna thianghlima inhmanna aṭanga lo awm lungawina neiin kan châwl hahdam bawk ang. (Thuf. 19:23) Ludi ang mi tuemaw hmuh avânga hlimna chu kan tawng mai thei asin!