“Hlau Suh”
1. Jeremia hmachhawn ang eng harsatna nge kan hmachhawn ve theih?
1 Jeremia chuan zâwlnei ni tûra tirh a nih khân tling lo nia inhriatna a nei a. Nimahsela, Jehova chuan, “hlau suh,” tiin a thlamuan a, a hnathawh tûr chu ṭha taka hlen thei tûrin a tichak a ni. (Jer. 1:6-10) Tûn laiah pawh, zahzumna emaw, inrin tâwk lohna emaw avângin rawngbâwlnaah kan tel ṭha lo pawh a ni thei. Mite chhân lêt ṭhat loh hlauhna emaw, min thlîr dan tûr hlauhna emaw chuan thu min hrilhtîr loh châng pawh a nei thei ang. Engtin nge chu hlauhna chu kan hneh theih ang a, eng malsâwmna nge a rah chhuah dâwn?
2. Engtin nge inbuatsaihna chuan rawngbâwlna chungchânga kan hlauhnate a sut kian theih?
2 Inbuatsaih Lâwk Rawh: Inbuatsaih ṭhatna chuan kan hlauhna chu nasa takin a su kiang thei a. Entîr nân, inbiakna tihtâwp tumte chhân lêt dân tûr kan lo inbuatsaih lâwk chuan, an hnial ṭhinnate chu kan chhâng thei ang. (Thuf. 15:28) School leh rawngbâwlnaa harsatna chi hrang hrangte hmachhawn thei tûra inbuatsaih nân, engvângin nge Chhûngkuaa Pathian Biakna neih hunah tihchhinna in neih loh vang?—1 Pet. 3:15.
3. Engtin nge Jehova rinchhanna chuan hlauhna hmachhawn thei tûra min ṭanpui?
3 Jehova Chu Rinchhan Rawh: Hlauhna do dân ṭha ber chu Pathian rinchhan hi a ni a. Jehova chuan ṭanpui min tiam tlat a ni. (Is. 41:10-13) Hei aia himna ṭha zâwk eng nge awm thei tehrêng ang? Chu bâkah, Isua chuan beisei loh dinhmun kan tawh hunah pawh Pathian thlarau thianghlim chuan ṭha taka thu hriattîr thei tûrin min ṭanpui ang tih min tiam a ni. (Mk. 13:11) Chuvângin, Jehova hnênah thlarau thianghlim dîlin kan ṭawngṭai ziah tûr a ni.—Lk. 11:13.
4. Harsatna tâwk reng chung pawha rawngbâwlnaa kan beih fan fanna chuan eng nge a rah chhuah?
4 Malsâwmna: Harsatna tâwk reng chung pawha rawngbâwlnaa kan beih fan fan chuan, kan la tawh tûr fiahnate chu hlawhtling taka hmachhawn thei tûra tihchakin kan awm ang. Thlarau thianghlima khatte neih mizia, huaisenna chu kan nei a ni. (Tirh. 4:31) Chu bâkah, Pathian Jehova ṭanpuinaa mi mal hlauhna kan hneh hian a chhandamna bân chak tak kan rinna leh kan rinchhanna chu kan thuam nghet sauh va. (Is. 33:2) Tin, kan Pa vâna mi kan tilâwm tih hriatna aṭanga lo awm hlimna leh lungawina kan nei bawk. (1 Pet. 4:13, 14) Chuti chuan, Pathian Jehova ṭanpuina ring reng chungin, Lalram thuchah chu huaisen takin i puang chhuak ang u!