Rawngbâwlna Inkhâwma Chanvo Neite Tâna Kaihhruaina

Tûn thla chhuak Kan Lalram Rawngbâwlna aṭanga inṭanin, Rawngbâwlna Inkhawm hun duana kaihhruaina thute chu a tihawlsam lehzual a ni. A hnuaia awm kaihhruaina leh hriat nawntîrnate chuan May 2009 chhuak Kan Lalram Rawngbâwlna-a chuang “Rawngbâwlna Inkhâwm Atâna Inbuatsaih Dân” tih thuziaka lang thute chu a tuaitharin, a tifiah lehzual a ni.

◼ Thusawi: Hei hi sawi tûra târ lan thute ṭanchhana thusawi a ni a, ngaithlatute chhân ve theih tûr a tel lo. Thusawitu chuan kohhran tâna ṭangkai ber tûr chu a ngaihsak bîk tûr a ni.

◼ Zawhna leh Chhânna: Vênnainsâng Zirna ang takin, hei hian thuhmahruai leh tlipna tawi tê a nei a, paragraph tinte tâna zawhna zawng zawng chu zawh chhuah vek tûr a ni. A kaihruaitu chu a ṭawng tuitam lutuk tûr a ni lo. Hun awm dân azirin Bible châng pawimawh takte chu chhiar theih a ni a. Kaihhruaina pêk a nih chauh loh chuan paragraph-te chu chhiar tûr a ni lo.

◼ Sawihona: Hei hi ngaithlatute chhân theihna tlêm tê telna thusawi a ni. Hei hi thusawi a ni lo va, zawhna leh chhânna lah a ni vek hek lo.

◼ Lemchan leh Biangbiaknate: Lemchana entîr tûra kaihhruaina pêk a nih chuan, a awmzia chu chanvo changtu unaupa chuan lemchana entîr tûr mite ruat tûrin mawhphurhna a nei tihna a ni; amah ngeiin lemchana a entîr a ngai lo. Amah ṭanpui tûra a mi thlante chu an thil entîr tûr atâna mi tling tak leh hming hliauna nei lo an ni tûr a ni a; tin, a theih chuan a hun a thlen hma hmâ takah ruahmanna a siam tûr a ni. Thuchhuahtu thar leh thiltawn la nei tam lote zînga ṭhenkhat chu in neitu atâna hman theih ni mah se, platform-a lan theihna hun remchâng pêk duh vâng ringawtin rawngbâwl dân tûr lemchana entîrtu atân hman tûr an ni lo. Thusawi dân lemchana entîrtu thuchhuahtute chu mipui lam hawi zâwnga entîr ngei tûrin an fîmkhur tûr a ni. Biangbiaknaa telte chuan an ṭhuthmun aṭanga thu sawi mai ai chuan platform aṭangin an sawi tûr a ni a. Lemchana entîrna leh biangbiakna te chu a hun thlen hmain tihchhinna neih phawt tûr a ni. Inkhâwm chu a hun taka zawh theih a nih dâwn loh va, unaupa chuan a thusawi a pawh tâwi a ngaih chuan, lemchan leh biangbiaknate chu a paih bo chuang lo vang. Kohhranho rawngbâwltute’n an thusawia tel tûrte an thlan hmain, upahote râwn khâwmtu (coordinator of the body of elders) emaw, upa dang tuemaw chu a râwn phawt tûr a ni.

Thusawi tûr a engemaw ber hian kaihhruaina bîk a neih chuan chûng chu fîmkhur taka zawm hrâm tûr a ni a. Unaupate chuan Rawngbâwlna Inkhâwma an thusawi tûrte hi tûna kan târ lan tâk anga tiin, “mawi tak leh fel taka tih” a nihna Rawngbâwlna Inkhâwm an awmtîr a ni ang.—1 Kor. 14:40.