“Finna Chu A Thiltih Aṭangin A Dikzia A Lang”
1. Engtin nge kan rawngbâwlna chu mi ṭhenkhatin an thlîr?
1 A châng chuan kan nihna hre chiang lo in neitu emaw, Jehova Thuhretute chungchâng thu dik lo hrilhhriatna dawng emawte hnên aṭangin chhân lêtna duhawm lo tak chu kan hmachhawn thei a. An thil thlîr dân chu ṭan lam neia chanchin puan chhuahte chuan a lo thunun deuh pawh a ni thei. Hmun ṭhenkhatah chuan kawng thianghlim lo tak hmanga “sakhaw inlehtîr” anga puh kan ni bawk. Chutianga sawichhiatna kan tawh hunah engtin nge kan chhân lêt ang?
2. Sawichhiatna kan hma chhawn hunah lunghnual lo tûrin engin nge min ṭanpui ang?
2 Rilru Put Hmang Ṭha Vawng Rawh: Kum zabi khatnaa Isua leh Pathian Jehova rawngbâwltu dangte chu hriat sual leh sawichhiat an ni fo va. (Tirh. 28:22) Mahse, sawichhiatna avângin an rawngbâwlna chu an zahpui chuang lo. Isua’n: “Finna chu a thiltih aṭangin a dikzia a lang” tiin a sawi. (Mt. 11:18, 19) Ani chuan thutak hmu duh tak zettute’n chanchin ṭha hlutna an hmu thiam ang tih ring tlat chungin, a Pa duhzâwng chu ṭhahnem ngai takin a thawk zêl a ni. Pathian Fapa ngei pawhin kan tawn ang a tawng ve tih hriat rengna aṭangin lunghnualna kan pumpelh thei a ni.
3. Engvângin nge chanchin duhawm lo tak leh dodâlnate chu mak kan tih loh vang?
3 Isua’n khawvêlin amah a huat ang bawkin a hnung zuitute pawh a hua ang tih a sawi a. (Joh. 15:18-20) Chuvângin, tûn laiah pawh chanchin duhawm lo tak leh dodâlnate chu mak kan ti tûr a ni lo. Dik takin, ni hnuhnûnga kan luh thûk tial tial avâng leh Setana thinurna a zual sauh avângin, chûng thilte a thlen nasat lehzual chu kan beisei tûr a ni. (Thup. 12:12) Chutiang thilte chu Setana khawvêl tâwpna a hnaih tawhzia hriltu a nih avângin kan hlim thei a ni.
4. Chanchin ṭha hrilhnaa chhânna duhawm lo tak kan tawh hunah engtin nge kan chhân lêt ang?
4 Zaidam Taka Chhânna: Chhân lêtna duhawm lo tak kan tawh hunah zaidam tak leh dawhthei takin kan chhâng tûr a ni. (Thuf. 15:1; Kol. 4:5, 6) A rem chuan, rilru ṭha pu in neitu hnênah Jehova Thuhretute chungchâng thu dik lo a than vêl chhan kan hrilhfiah thei a, a nih loh pawhin chutiang ngaih dân a neih chhan chu kan zâwt thei a ni. Zaidam taka kan chhânna chuan Jehova Thuhretute chungchâng a lo hriatte chu ringhlel tûr leh Thuhretute’n an tlawh leh huna an thusawi lo ngaithla tûrin a chêttîr thei a ni. Amaherawhchu, in neitu chu a thinur hle a nih chuan, hawihhâwm taka kan inbiakna titâwp a, kalsan mai chu thil ṭha ber a ni thei ang. Mite’n eng ang pawhin min thlîr mah se, Jehova chuan kan rawngbâwlna a hlut a ni tih kan chiang thei a ni.—Is. 52:7.