Bible Zirpui Neih Tum Tlat Rawh
1. Matthaia 28:19, 20-a Isua thu min pêk hlen chhuahnaah hian eng nge tel?
1 Isua chuan: “Mi zirtîrahte siam ula, . . . zirtîr rawh u,” tiin thu min pe a. (Mt. 28:19, 20) Chuvângin, engtik lai pawha Bible zirpui neih tum tlat mi nih chu kan duh a ni. Chu mi atân a hnuaia rawtnate hi a ṭangkai thei ang.
2. Tute nge Bible zirpui tûra kan sâwm ang?
2 Zirpui Tûrin Sâwm Rawh: Bible zirpui tûra mite kan sâwm hnem poh leh zirpui neih theihna hun remchâng kan nei lehzual ang. (Thur. 11:6) Kan thuchah ngaihventu rêng rêng chu Bible zirpui tûrin i sâwm ṭhîn em? Kohhran pakhat chuan thla khat pumhlûm chu Bible zirpui neih ṭan tuma beih nân an hmang a. Chu mi avânga Bible zirna thar 42 an nei thei chu an va phûr tehlul êm! Tuina nei i hmuhte chuan mite Bible i zirpui ṭhîn tih an hriat ring mai suh. I tlawh leh hunah chuan engvângin nge Bible zirpui tûra i sâwm loh vang? An lo duh lo a nih pawhin a pawina a awm rêng rêng lo. An tuina chu i neih chhunzawmtîr zêl thei a ni. In ṭhenawmte, in chhûngte, i hna thawhpuite, leh school kalpuite chu Bible zir an duh leh duh loh i zâwt tawh em? I Bible zirpuite hnênah pawh zir ve duh ṭhiante emaw, chhûngte emaw an neih leh neih loh i zâwt thei bawk ang.
3. Bible zirpuina neih ṭan theihna hmanraw ṭangkai tak eng nge kan neih a, eng hunah nge kan hman ang?
3 Hmanraw Ṭangkai Tak: Bible zirpui ṭan theihna hmanraw ṭangkai tak chu Thutak Hriat I Duh Em? tih tract hi a ni a. Chu chu chanchin ṭha ngaihven tak taktute hnênah i pe thei ang. Tin, tlawhkîr i neih hunah pawh i hmang thei bawk ang. Thlawhhma rawngbâwlnaah te, bus-a i chuan hun te, i bazaar hun te, leh i hna thawhnaah te engvângin nge i ken reng loh vang? A phêk tâwp berah chuan Bible zirpui kan neih dân hrilhfiahna leh Bible Zirtîrna bu hmêlhriattîrna tawi fel tak hmuh tûr a awm a ni.
4. Engtin nge Thutak Hriat I Duh Em? tih tract chu Bible zirpui ṭan nâna kan hman theih ang?
4 Chu tract chu tuina neite i pêk hnuah, a phêk ṭan tirha zawhnate chu kawhhmuhin, “Hêng zawhnate zîngah hian khawi ber hi nge i hriat châk?” tiin i zâwt thei a. Chutah a chhûng thu aṭangin a chhânna sawipui la, a phêk tâwp bera Bible zirpui kan neih dân chungchâng thuziak chu chhiar emaw, hrilhfiah emaw la. Tichuan, chu mi chungchâng kim lehzuala a chuanna Bible Zirtîrna bu bung leh phêk number-te kawhhmuhin, lehkhabu chu pe la, tlawhkîra sawiho leh dân tûr ruahmanna siam ang che.
5. Engvângin nge Bible zirpui neih kan tum tlat ang?
5 Kan thu hrilhna bialah hian Bible zirtîrna dik tak hriat châk an la awm a. Chutih rualin, sakhaw lam thil avânga ṭûl lo taka mite rilru kan tihnat loh nân remhriatna leh hriat thiamna kan neih a ngai bawk a ni. Bible zirpui neih tum tlatin, mi dangte nunna kawnga kal tûra ṭanpui theih avânga hlimna neih theihna hun ṭha kan neih belh ang.—Mt. 7:13, 14.