‘He Chanchin Ṭha Hi Hrilhin A Awm Ang’!

1. Thu hrilhna chu engmahin a dang thei lo tih engtin nge kan hriat?

¹ Pathian Jehova chu a duhzâwng hlen chhuak lo tûrin engmahin a dang thei lo. (Is. 14:24) Rorêltu Gideona leh a mi 300-te tân chuan Midian sipai 1,35,000 lai hneh chu thil theih niin lang lo mah se, Pathian Jehova chuan a hnênah: “Israel-ho hi Midian-ho lak ata chhandam ang che: ka tîr che a ni lâwm ni?” tiin a hrilh a ni. (Ro. 6:14) Eng hna hian nge tûn laiah Pathian Jehova ṭanpuina dawng? Isua chuan: “He ram chanchin ṭha hi . . . khawvêl zawng zawngah hrilhin a awm ang,” tiin a sawi a. (Mt. 24:14) Tumahin he hna hlen chhuahna hi an dang thei lo vang!

2. Rawngbâwlnaah Pathian Jehova’n a mi mal taka min ṭanpui chu engvângin nge kan beisei theih?

² Pathian Jehova Chuan A Mi Malin Min Ṭanpui: Pathian Jehova chuan a Thuhretute chu a huho angin a hlawhtlintîr dâwn tih kan rin tlat theih rualin, a mi mal zâwnga min ṭanpui chu kan beisei thei em? Tirhkoh Paula chuan ṭanpui a ngaih laiin Pathian Jehova’n a Fapa, Isua kal tlangin a ṭanpui tih a hria a. (2 Tim. 4:17) Pathian Jehova chuan a duhzâwng hlen chhuah nâna a mi mala kan thawhrimna chu mal a sâwm ve ngei dâwn tih kan ring tlat thei a ni.—1 Joh. 5:14.

3. Eng dinhmunahte nge Pathian Jehova’n min ṭanpui?

³ Nî tin lungkhamnate chuan rawngbâwlna atâna tha leh zung nei tawh lo khawpin a tichau che em? Ani chuan, “Chau hnênahte chuan thiltihtheihna a pe ṭhîn.” (Is. 40:29-31) Tihduhdahna emaw, dodâlna emaw i tâwk em? “I rit phurh chu LALPA chungah nghat la, tichuan anin a tichak ang che.” (Sâm 55:22) Mahni inrin tâwkna tlâkchham châng i nei em? “Kal mai rawh, i kâ chu keiman ka awmpui zêl ang.” (Ex. 4:11, 12) I hrisêlna a ṭhat loh avângin rawngbâwlnaah i tel hlei thei lo vem? Theih tâwp chhuaha i rawngbâwlna chu bei tham hle mah se, Pathian Jehova’n a hlut a, a hmang ṭangkai thei a ni.—1 Kor. 3:6, 9.

4. Pathian Jehova rinchhanna chuan engtin nge min nghawng ang?

⁴ Pathian Jehova kut chu “pharin a awm tawh a, tuin nge lâk kîrtîr ang?” (Is. 14:27) Kan rawngbâwlnaa Pathian Jehova malsâwmna chu rinchhan tlat chungin, bâng lo leh remhre takin ‘Lalpaah huai takin thu i hril’ zawm zêl ang u.—Tirh. 14:3.