Zawhna Bâwm
◼ Kohhran inkhâwmna chu thu zirna hmun ṭha tak nihtîr tûrin mi tinin eng nge an tih theih? (Deut. 31:12)
Pathian Jehova leh a ruahmanna siam kohhran inkhâwmte zahna avângin, mi tinte chu hma taka thleng a, a zirtîrna dawng tûra inpeih sa tûra fuih an ni a. Tlar hnung lama ṭhutnate chu nu naute leh a chânga lo thleng tlaite ṭhutna atâna dah a, a hma lama ṭhut chu a ṭangkai a ni. Inkhâwm ṭan hmain, cellphone leh pager ang chi electronic thilrêng rêng chu thu ngaithlatute tibuai lo tûra set ṭhat tûr a ni a. Inkhâwm chhûng zawnga Pathian zahna rilru put hmang kan neih ṭheuh chuan, min tibuai thei thil chu a thleng tlêmin, min tihbuai dân pawh a nêp deuh vang.—Thur. 5:1; Phil. 2:4.
Mi tharte an rawn inkhâwm ṭan hian, kohhran chhûnga an mi hriatte chuan an ṭhutpui tûr a ni a. Naupang enkawl ngai neite an nih chuan chutianga ṭhutpui chu a ṭangkai lehzual ang. Chutiang inkhâwma tel chu an chhûngkaw tân chuan thil thar pawh a ni thei a. Chutiang a nih chuan, an fate mamawh ngaihsak tûra an thawh lawk a ngaih hunah pawh mi dangte an tihbuai tam loh nâna a hnung lama ṭhut chu an duh ngei a rinawm a ni. (Thuf. 22:6, 15) Naupang nei chhûngkuate chu an fate’n bengchheng siam thei nia an inhriat theihna tûr pindan hranah an ṭhu tûr a ni lo. Nu leh pate tân a ṭûl anga zilhna leh an mamawh ngaihsakna pe tûra an fate hruai chhuah leh a hnua inkhâwmnaa hruai luh leh mai chu a ṭha ber tlângpui ṭhîn a ni.
Inkhâwm enkawltu attendant-te chu Pathian biakna hmun nêna inchawih boruak awmtîrtu tûr an ni a. Anni chuan chhûngkuate leh a chânga lo thleng tlaite tân ṭhutna inâwm tak chu an zawnpui a ni. Inkhâwm enkawltute chu mi dangin tibuaitu awm lova hahdam taka an ṭhut theih nâna ṭanpuina kawngah remhre tak leh fing thiam tak an ni a. Beisei loh taka buaina lo chhuakte chu ṭha takin an chingfel zung zung ṭhîn. Naupang awm ṭha lovin mi dangte tâna buaina a thlen chuan, anni chuan ṭha takin an ṭanpui ṭhîn bawk.
Kohhran inkhâwmna chu Pathian Jehova leh a remna leh felna khawvêl thar chungchâng zirnahmun ṭha tak nihtîr tûrin mi tinte chuan an ṭanpui thei ṭheuh a ni.—Heb. 10:24, 25.