Chhiartute Zawhna

Setana’n Evi hnênah a chhia leh a ṭha hriatna thei rah i ei chuan i thi lo vang tia a sawi khân, mihringte hian thlarau thi thei lo kan nei tih tûn laia ngaih dân hluar tak hi a hmêlhriattîr tihna a ni em?

A nih a rinawm loh. Diabola chuan Evi hnênah Pathian khap thei rah a ei chuan, ani chu thi ang chauhvin a awm ang a; mahse, a taksa pêng hmuh theih loh (tûn laia mi ṭhenkhatin thlarau thi thei lo tia an sawi) chu hmun dangah a la nung zawm zêl ang tih a hrilh lo. Setana chuan Evi’n chu thei rah a ei chuan ‘a thi rêng rêng lo vang,’ tiin rûl hmangin a sawi a. Ani chuan Evi chu a nung zawm zêl ang a, Pathian laka inla hrangin, leiah hian nun ṭha zâwk neiin a nung reng ang a tihna a ni.—Gen. 2:17; 3:3-5.

Mihringte hian thlarau thi thei lo kan nei tih tûn laia an zirtîr, thurin dik lo chu Eden huan aṭanga inṭan a nih si loh chuan, eng hun aṭanga inṭan nge ni ta ang? Chiang fak chuan kan sawi thei lo. Mahse, biakna dik lo zawng zawng chu Nova hun laia Tuilêtah khân a bo vek tih erawh kan hre chiang a ni. Tuilêtah khân biakna dik vuantu Nova leh a chhûngte chauh an dam khawchhuah avângin, sakhaw dik lo thurin rêng rêng chu a bo vek a ni.

Chuvângin, mihringte hian thlarau thi thei lo kan nei tih zirtîrna chu Tuilêt hnu aṭang chauhva inṭan a ni ngei ang. Pathianin Babel-a ṭawng a tihhransak khân mite chu ‘chuta ṭang chuan lei zawng zawngah tihdarh’ an nih avângin, thlarau thi thei lo thurin pawh an chhawm zêl tih rinhlelh rual a ni lo. (Gen. 11:8, 9) Chu zirtîrna dik lo chu eng hun aṭanga inṭan pawh ni se, thurin tichhuaktu chu “dâwt pa,” Diabol Setana a ni a, khawvêl puma a darh chhuak a hmuh chuan a lâwm hle ngei ang.—Joh. 8:44.