Ka Tân Chuan Pathian A Awm Lo

KA TUN HMA NUN

German Democratic Republic (GDR) rorêlna hnuaia awm Saxony hmuna khawte pakhatah ka piang a. Kan in chhûng boruak chu a nuamin a hlimawm hle a, ka nu leh pate chuan nunchang ṭha hlutna min zirtîr ṭhîn a ni. GDR chu Communist ram a nih avângin Saxony hmuna chêngte tân chuan sakhua chu a pawimawh lo hle a. Chuvângin, ka tân chuan Pathian a awm lo a ni. Kum 18 mi ka nih thlenga ka nun thununtu thurin pahnih chu: Pathian a awm lo tih leh Communist ngaih dân hi a ni.

Communist ngaih dân hi engvânga duh nge ka nih? Mi zawng zawng an intluktlâng vek a tih vâng a ni. Chu bâkah, thil neih zawng zawng hi fel taka sem rual a nih chuan hausak lutukna emaw, retheih lutukna emaw hi a tâwp ang tih ka ring bawk. Chuvângin, Communist ṭhalai pâwlah telin ka buai hle a. Kum 14 mi ka nihin, lehkha chhe tawhte thil danga siam ṭha leh tûra chhehvêl tihfaina lama thil tihhonaah hun ka hmang tam hle a. Aue khawpuia chêngte chu ka thawhrimna chunga an lâwm êm avângin thuneitute chuan lâwmman min pe hial a ni. La naupang vuai mah ila, GDR politics hotu ṭhenkhatte chu ka hria a. Nun kawng ṭha tak ûm niin ka inngai a, ka nakin hun pawh a ṭha viauvin ka hria a ni.

Tichuan, ka dinhmun chu a inthlâk ta thut mai a. Kum 1989-ah Berlin Bang a chim rualin Europe khaw chhak lama Communist ṭangrual pâwl pawh a chhe ve a. Thil makte chu indawt zutin a thleng a. GDR mite zîngah pawh fel lohna a awm tih ka hre ta thuai a. Entîr nân, Communist thlâwp lotute chu ram dang mi anga cheibâwl an ni a. Chu chu engtin nge a nih theih? Keini Communist mite hian mi zawng zawng chu intluktlâng vek niin kan ring a ni lawm ni? Communist ngaih dân hi inbumna mai em ni? Ka rilru a buai hle.

Chuvângin, ka thil dah pawimawhte chu ka thlâk a, music leh lemziah lam ka ngaihven ta a. Music academy-a ka zir theih avângin—university a zir zawm theih hmêla—musician leh lemziak thiam nih chu ka tum ta a ni. Chu bâkah, ka naupan laia ka zir nungchang ṭha hlutnate chu ka kalsan ta a. Tûna ka tâna pawimawh ber chu vawi khata nula tam tak kawp lâwr a, nuam chen hi a ni mai. Mahse, music te, lemziah te, leh zalên taka nun hmannate chuan ka lungngaihna chu a sukiang chuang lo. Ka lemziahte ngei pawhin rilruah hlauhna ka neihzia a târ lang a. Ka hma lam hun hi eng tak ni ang maw? Nunin a tum ber chu eng nge ni?

A tâwpah, ka thil zawnte chhânna ka hmuh chuan mak ka ti khawp mai. Tlai khat chu, ka zîrna school-ah ka zirpuite nên hma lam hun tûr sawihovin kan ṭhu khâwm a. Kan zînga zirlai pakhat Mandy-ia chu Jehova Thuhretu a ni a. Ani chuan chu mi tlai chuan kawng dik min kawhhmuh a ni. “Andreas, nun leh nakin hun chungchânga i zawhnate chhânna hmuh i duh chuan, ngun takin Bible bih chiang rawh,” tiin min hrilh a.

Ka ring hlelin, ka hre châk bawk si a; mahse, a tâwpah ka hriat châknain min hneh ta a. Mandy-i chuan Daniela bung 2-na chhiar tûrin min ti a, ka thu chhiar avâng chuan mak ka ti khawp mai. Chu hrilh lâwkna chu tûn kan hun thleng pawha awmze nei tak khawvêl thuneitu, sawrkârte chanchin a ni. Mandy-i chuan kan nakin hun chungchâng târ langtu Bible hrilh lâwkna dangte pawh min hmuh a. A tâwpah, ka zawhna chhânnate chu ka hmu ta a ni! Mahse, chûng hrilh lâwknate chu tu ziah nge ni a, hetiang khawpa dika hma lam hun sawi lâwk theitu chu tu nge a nih? A nih chuan, Pathian chu a awm tak tak thei ang em?

BIBLE-IN KA NUN A THLAK DANGLAM DAN

Mandy-i chuan Thuhretu Horst-a leh Angelika-i te nupa nên min hmêlhriattîr a, anni chuan Pathian Thu hre thiam lehzual tûrin min ṭanpui a ni. Jehova Thuhretute chu Pathian Jehova hming lamtu leh chawimawitu sakhaw pâwl awmchhun an ni tih ka hre ta thuai a. (Sâm 83:18; Matthaia 6:9) Pathian Jehova’n mihringte chu lei paradis-a chatuana nung tûrin a duh tih ka hre bawk a ni. Sâm 37:9-na chuan: “LALPA nghâktute erawh chuan ram hi an luah ang,” tiin a sawi a. He beiseina hi Bible-a târ lan Pathian nungchang tehna mila nung duhtu zawng zawngte tân a ni tih hian ka rilru a khawih hle a ni.

Bible zirtîrna mila nung tûrin ka nun kawng zawh chu thlâk ka tum ta a. Musician leh lemziak thiam nihna chuan min ti chapo va, chuvângin, inngaihtlâwmna engemaw chen kan neih phawt a ngai a ni. Chu bâkah, nungchang inthlahdah tak bânsan chu ka tân a awl lo hle. Jehova chu Bible zirtîrna mila nun tumtute chungah a dawhtheiin, ngil a neih bâkah, hriatthiamna a neih avângin ka va lâwm tak êm!

Communist ngaih dân leh Pathian awm lo tih rinna chuan kum 18 mi ka nih laia ka nun chu a thunun a; Bible chuan chumi hnua ka nun chu a thlâk danglam ve thung. Ka thil zirte chuan hma lam hun atâna ka lungngaihna a tihbo bâkah nunah thiltum min neihtîr a ni. Kum 1993-ah, Jehova Thuhretute zînga mi niin baptisma ka chang a, kum 2000-ah ṭhahnemngai taka thu hriltu Tabitha-i nên kan innei a ni. Bible hre tûra mi dangte ṭanpuinaah a tam thei ang berin hun kan hmang a. Kan mi tawn tam takte chu keimah anga Communist ngaih dân leh Pathian awm lo ringtute an ni. Anni chu Jehova hre tûra ka ṭanpui theih avângin lungawina nasa tak ka nei a ni.

KA HLAWKPUI DAN

Jehova Thuhretute ka kawm hmasak ber ṭhum chuan ka nu leh pate’n an duh lo hle a. Mahse, chuta ṭang chuan, Thuhretute nêna kan inkawmnain ka chungah nghawng ṭha tak a nei tih an hmu chho ta a. Tûnah chuan, Bible an chhiara, Jehova Thuhretute inkhâwmah an tel avângin ka lâwm tak zet a ni.

Nupa tâna Bible thurâwn pêkte chu Tabitha-i nên theih tâwpa kan nunpui avângin kan nupa nun chu a hlim hle a. Entîr nân, nupa inkâra rinawm tawn tûra Bible thurâwn pêkte kan zuina chuan kan inneihna a tinghet lehzual a ni.—Hebrai 13:4.

Tûnah chuan, nuna hlauhthâwnna leh nakin hun atâna lungngaihna ka nei tawh lo. Remna leh inlungrualna dik tak neitu khawvêl pum huap chhûngkaw zînga mi niin ka inngai tawh a. He chhûngkuaah hian intluktlâng vekin kan indâwr a. Chu ngei chu ka thil rin tlat leh ka nuna ka neih duh tak chu a ni.