A KAWM THU | SETANA A AWM TAK TAK EM?
Setana Chu A Awm Em?
Spain Rama, Madrid Khawpuia lim chher pakhat chuan vântirhkoh sual Setana a entir a ni
“El Salvador rama seilian ka ni a. Thu ka âwih loh chângin ka nu chuan, ‘Diabola’n a man dâwn che!’ a ti ṭhîn a. Mahse, kei chuan, ‘Mi man rawh se!’ tiin ka chhâng ṭhîn, Pathian awm chu ka ring a, Setana a awm ka ring si lo va.”—ROGELIO-A
Naupang Rogelio-a ngaih dân chu i ṭawmpui em? A hnuaia târ lan ngaih dân zînga a eng ber hi nge dika i rin?
Setana chu a awm tak tak lo; sual chhinchhiahna mai a ni.
Setana chu a awm tak tak a; mahse mihringte a ngaihsak meuh lo.
Setana chu mihringte nasa taka thununtu thlarau thil siam thiltithei tak a ni.
Hêng ngaih dânte hian thlâwptu mi maktaduai tam tak a nei ṭheuh va. Mahse, a eng ber hi nge dik tih hriat chu a pawimawh tak zet em? Awle, Setana a awm lo a nih chuan, awm tak tak anga ngaitute chu bumin an awm tihna a ni ang a. Setana chu awm mah se, mihringte a ngaihsak lo a nih chuan, mi tam tak chu chhan awm lovin an hlau thlâwn tihna a ni ang. Amaherawhchu, Setana chu mite thiam taka bum kualtu a nih chuan, mi tam takte ngaih aiin a hlauhawm zâwk daih tihna a ni thung ang.
Hêng zawhnate Bible-in a chhân dân hi i lo ngaihtuah ang u: Setana chu tu nge, a nih loh leh eng nge a nih? Sual sawina mai nge ni a, thlarau thil siam zâwk? A awm ngei a nih chuan, Setana chu i tân a hlauhawm em? A hlauhawm a nih chuan, a lakah engtin nge i invên theih ang? (w14-E 11/01)