Pathianin A Thlamuan Thei Che

MI ṬHENKHATTE’N AN RINHLELH CHHAN: Mi ṭhenkhat chuan thlamuanna an mamawh hle pawhin, an buainate hmachhawn thei tûr leh inrawlh tûra Pathian hnêna ṭanpuina dîl chu a hmasialthlâk niin an ngai a. Raquel-i chuan: “Khawvêla mi tam takte—leh buaina khirh tak tak an tawhte ka en hian, ka buaina chu a tê tham hle nia a lan avângin Pathian hnêna ṭanpuina dîl ka hreh phah a ni,” tiin a sawi.

BIBLE ZIRTIRNA CHU: Pathian chu mihringte ṭanpui tûr leh thlamuan tûrin kawng chhinchhiahtlâk takin a inrawlh dêr tawh a. Leia awm mi tute pawh hian sualna—Pathian thil phûtte ṭha famkim taka tlin theih lohna chu an rochung a. Mahse, Pathian chuan “min hmangaih a, kan sualte thupha chawina ni tûrin a Fapa [Isua Krista] a rawn tîr” a ni. (1 Johana 4:10) Inthawina atâna Isua thihna hmangin Pathian chuan sual ngaihdamna te, chhia leh ṭha hriatna thiang te, leh remna khawvêl thara chatuan nun beiseinate nei tûrin kawng min hawnsak a.a Mahse, chu inthawina chu mi nâwlpuite tân mai nge ni a, Pathianin a mi malin a ngaihsak che tih a lan chhuahtîrna zâwk?

Tirhkoh Paula chungchâng hi han ngaihtuah teh. Ani chu Isua inthawinain a rilru a khawih êm avângin: “Rinnaa nung ka ni—Pathian Fapa, mi hmangaiha ka aia inpetu rinnaah chuan,” tiin a ziak. (Galatia 2:20) Isua chu Paula Kristian a nih hmain a thi a. Chuti chung pawhin, Paula chuan Isua inthawina chu a hnêna a mi mala Pathian thilpêk angin a thlîr a ni.

Inthawina atâna Isua thihna chu a mi mala Pathian pêk che a ni a. He thilpêk hian Pathian tâna i hlutzia chu a târ lang a ni. Chu chuan “chatuana thlamuanna leh beseina ṭha” a pe thei che a, chutiang bawkin ‘thil tihṭhat leh thusawi ṭhat tinrêngah a tinghet’ che a ni.—2 Thessalonika 2:16, 17.

Mahse, kum 2,000 vêl kal taah khân Isua’n a nun chu inthawina atân a hlân a. Tûn laiah Pathianin amah nêna inlaichînna nei tûrin a duh che tih eng finfiahna nge awm? (w14-E 08/01)