Engvângin Nge Mite An Ṭawngṭai?

I ṭawngṭai ziah ṭhîn em? Mi tam tak chu an ṭawngṭai ṭhîn a, Pathian awm ring lotute hial pawh an ṭawngṭai ṭhîn a ni. Mahse, engvângin nge mite an ṭawngṭai? France rama mipui ngaih dân lâk khâwmna chuan, France ram mipui a zât vete chu “ngaih ṭhat nân mai” an ṭawngṭai, a nih loh leh urhsûn taka inngaihtuahna hun an nei ṭhîn tih a târ lang. Anni chu Europe mi tam takte ang bawkin, Pathian biak nâna ṭawngṭai an ni lo va. “Ṭawngṭainain rilru nawmna a neihtîr” chu an beisei zâwk a ni. Kawng leh lamah chuan, ringtu ṭhenkhatte chu an mamawh hunah chauh Pathian lam an hawi a, an thil dîlte chhânna hmuh nghâl an inbeisei a ni.—Isaia 26:16.

I chungchâng eng nge ni ve le? Ṭawngṭaina hi ngaihtuahna fîm nei tûra ṭanpuitu ang lekin i ngai em? Pathian i ring a nih chuan, ṭawngṭainain a ṭanpui dân che chu i hmu em? Nge ni a, i ṭawngṭaina chu chhân loh niin i ngai zâwk? Ṭawngṭaina chu rilru nawmna thil ang mai ni lovin, Pathian hnaih nâna puitu hlu tak anga thlîr tûrin Bible chuan a ṭanpui thei che a ni. (w14-E 04/01)