Thihna Tûr Hlauhawm

Thihna hi sawi nuam lo tak a ni a. Mi tam tak chuan chu mi chungchâng sawi loh chu an duh a ni. Mahse, engtik nîah emaw chuan, chu chu kan la tawng ngei dâwn a. Thihna tûr chu a hlauhawmin a na thei hle.

Nu leh pa emaw, kawppui emaw, fa emaw chân tûrin kan inpeih tawh tih rêng a awm thei lo. Vânduaina chu vawilehkhatah a lo thleng thut thei a, a nih loh leh rei tak chhûng a thleng thei bawk. Eng kawng pawhin lo thleng se, thihna tawrh hrehawmna chu pumpelh theih a ni lo va, a tâwpah chuan chhiatna râpthlâk tak a thlen thei a ni.

Motor chêtsualnaa a pa chântu Antonio-a chuan heti hian a sawi: “Thihna hi tuemawin i in chu luh theih loh tûra a kalh a, a chabi a la ta daih ang hi a ni a. Rei lo tê atân pawh i hâwng thei lo. I neih awmchhun chu rilrua i hriat rengna chauh a ni ta. Hei hi i dinhmun thar a ni a. Dik lo hle anga a lan avângin âwih loh tum mah la, tih theih rêng i nei lo,” tiin.

Kum 47 mi a niha hmeithai Dorothy-i chuan chutiang chânna ang a tawh chuan, chhânna ṭhenkhat hmuh a tum a. Sanday–school zirtîrtu a nih angin, thihna hi tâwp hlenna a nih a ring ngai lo va. Mahse, engmah chiang taka hriat a nei lo. “Kan thih hian kan chungah eng nge lo thleng?” tiin an Anglican kohhran rawngbâwltu chu a zâwt a. Ani chuan: “Tuman an hre chiang tak tak lo. A hun lo thleng se kan la hria ang chu,” tiin a chhâng a ni.

‘A lo thlen huna hre chauh’ tûra tih kan ni em? Thihna hi tâwp hlenna a nih leh nih loh chiang taka hriat theih dân kawng a awm em? (w14-E 01/01)