Isua Thawhlehna Chu Chatuana Nun Theihna!

ISUA thawhlehna chu tûn laia kan tâna awmze nei meuh lo, hmân lai thilthleng satliah mai a ni lo. Tirhkoh Paula chuan a pawimawhna chu heti hian a ziak a ni: “Krista chu mitthi zîng ata kaihthawhin a awm tak zet a ni, muhîlte thawh hmahruaitu a lo ni ta. Mihring vânga thihna a lo awm avângin mihring avâng vêkin mitthi thawhlehna a lo awm ta bawk a. Adama-ah chuan mi zawng zawng an thi ṭhîn ang hian Krista-ah chuan mi zawng zawng tihnunin an awm bawk ang.”—1 Korinth 15:20-22.

Isua chu Nisan 16, C.E.33-ah kaihthawh a ni a, chu chu Judate’n Jerusalem-a biak in hmun thianghlimah an thlai thar hmasa berte Pathian Jehova hnêna an hlan nî a ni a. Paula’n Isua chu thawh hmahruaitu tia a kohna aṭang hian, thihna ata tho leh tûr dangte an awm tih a lang a ni.

A dawta Paula thusawi chuan Isua thawhlehnain a awmtîr theih thilte chu a târ lang a ni. Paula chuan “mihring [pakhat] vânga thihna a lo awm avângin mihring [pakhat] avâng vêkin mitthi thawhlehna a lo awm ta bawk a,” tiin a sawi a. Adama aṭanga sualna leh ṭhat famkim lohna kan rochun avângin kan zavaiin kan thi a ni. Amaherawhchu, tlan nâna a nun ṭha famkim pêin, Isua chuan mi zawng zawng tân sual leh thihna ata chhan chhuahna kawng a hawng a ni. Paula chuan Rom 6:23-ah chuan, heti hian thiam takin a khaikhâwm a ni: “Sual man chu thihna a ni si a; Pathian thilthlâwnpêk erawh chu kan Lalpa Krista Isua zârah chuan chatuana nunna a ni,” tiin.

Isua ngeiin a thihna leh a thawhlehnain kan tâna awmzia a neih chu a sawi a. Heti hian amah leh amah a insawi a ni: “Mihring Fapa hi khaikânin a awm . . . tûr a ni; tupawh a ring apiangin amah avânga chatuana nunna an neihna tûrin. Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tiin.—Johana 3:14-16.

Natna te, hrehawm tawrhna te, leh lungngaihna te awm tawh lohna tâwp nei lo nun chu han ngaihtuah teh! (Thu Puan 21:3, 4) Hma bâk hlimawm tak a va ni êm! Mi thiam pakhat chuan: “Thlânmualin nun tawizia min hriat chhuahtîr laiin, thawhlehna erawh chuan thih chhûng tawizia a nemnghet a ni,” tiin a khaikhâwm a. Ni e, Isua thawhlehna chu chatuana nun theihna a ni! (w13-E 03/01)