Lehkhabu Satliah Mai A Ni Em?

“Pathian Lehkha Thu zawng zawng hi Pathian thâwk khuma pêk a ni a, . . . a sâwt bawk a ni; Pathian mi chu hna ṭha tinrêng thawk tûra kim taka inthuamin a famkim theih nân.” —2 TIMOTHEA 3:16, 17.

BIBLE hi engkim tâna inthuam famkimna a ni tih chu mi zawng zawngin an pawm vek lo va. Nang eng nge i ngaih ve dân? A hnuaia târ lante zînga a khawi ber hian nge Bible i thlîr dân hrilhfiah ṭha ber?

• Thu leh hla chhuah ṭha tak

• Sakhaw lehkhabu thianghlimte zînga pakhat

• Zirtîr ṭha tak nei thawnthu bu

• Pathian Thu

A kaihhnawih zawhna chu, I thil rin chuan pawimawhna a nei em?, tih hi a ni. Bible a insawi dân hi lo ngaihtuah teh: “Pathian Lehkha Thua chhelna leh thlamuanna hmua beiseina kan neih theihna tûrin, hmân laia ziak apiangte chu keimahni min zirtîrna turin ziak a ni si a,” tih hi. (Rom 15:4) Chuvângin, Bible chuan min zirtîr tûr, min thlamuan tûr, leh beiseina min pe tûra ziak a nihzia a sawi a ni.

Mahse, Bible chu thu leh hla chhuah ṭha tak mai emaw, sakhaw lehkhabu thianghlimte zînga pakhat mai emaw a nih chuan, a bîk takin, a thu chah chu dik nia i hriat nêna a inan loh hunah nangmah leh i chhûngte zirtîr a, kaihruaitu atân i rinchhan dâwn em ni? Bible chu hmân laia thawnthu phuahchawp lâwr khâwm mai a nih chuan, a thutiamte aṭangin thlamuanna leh beiseina i nei thei dâwn em ni?

Kawng lehlamah chuan, Bible zirtu mi maktaduai têlte chuan chu chu Pathian Thu, danglam bîk tak a ni tih an ring thlap a ni. Engvângin nge? Engin nge Bible chu lehkhabu dang zawng zawngte laka tidanglam bîk? A dawta thuziaka târ lan Bible danglam bîkna kawng pangate ngaihtuah tûrin kan sâwm a che. (w12-E 06/01)