Chhiartute Zawhna Siam . . .

Nu leh pate chuan an fate chu mipat hmeichhiatna chungchâng an zirtîr tûr a ni em?

▪ Nu leh pa tam tak chuan an fate’n natna hlauhawm an vei loh nâna vênghim tûrin theihtâwp an chhuah a. Nungchang lama rilru put hmang hlauhawm takte laka vênhim nân pawh chutiang bawka theihtâwp an chhuah chu a ngai a ni. An tih theih dân kawng khat chu mipat hmeichhiatna chungchânga an hriat tûr âwm tâwk zirtîrna pêk hi a ni. (Thufingte 5:3-23) Naupangte chuan TV te, Internet te, lehkhabu te, leh comics bu-te aṭangin mipat hmeichhiatna lam thil chiang tak leh ngialngan tak an hmuh tam tawlh tawlh avângin, nu leh pate zirtîrna leh nungchang lama kaihhruaina chu an mamawh a ni.

Zirna lama professor leh ziak mi Diane Levin-i chuan: “Tûn laia kan harsatna hi kan fate’n mipat hmeichhiatna chungchâng an zir hi a ni lo. Harsatna ber chu an thil zir te, an upat lam te, leh a zirtîrtute lam zâwk hi a ni. Naupangte chuan thil faktute leh tûn laia chîn dân lârte aṭangin mipat hmeichhiatna chungchâng zirtîrna mi hneh thei tak leh tichhe thei tak an dawng a ni,” tiin a sawi.

Nu leh pate tân mihringte tichhe mêktu thlîr dân vei herh leh bawlhhlawh tak tak lak aṭangin an fate vênhim a ngai a. (Thufingte 5:1; Ephesi 6:4) Naupangte chuan an taksa hnathawh dân te, tisa lama inenkawl dân te, leh nungchang bawlhhlawhte laka invênhim dân te an hriat a ngai a ni. Hmeichhe naupang chuan a tleirâwl chhuah hma—mipat hmeichhiatna lamah a puitling ṭan tih a lan chhuah hma—chuan a taksaa danglamna lo awm tûr leh thi neih a nih chhan leh a nih dânte a hriat a ngai a ni. Chutiang bawkin, mipa naupang pawhin, a mut hlâna thil chhuak a neih tûrte a hriat lâwk a ngai bawk. Nu leh pate chuan an fate an la naupan hle lai aṭangin an taksa pêngte hming dik tak an hrilhhre ṭan thei a. Hmangaihna nei nu leh pate chuan an fate hnênah chûng taksa pêngte chungchângah thil pawimawh pathum an zirtîr a ni: (1) Chûng chu thil ṭha tak leh mi mal ta liau liau a ni. (2) Chûng chu a ṭha lo zâwnga sawi tûr a ni lo. (3) Chûng chu khawih mai mai leh mi dangte hmuhtîr mai mai tûr a ni lo. Naupang chu an lo len deuh hun chuan, nu leh pate tân hmeichhiain nau a pai dân hrilhfiah hun hriat a ngai a ni.a

Eng hunah nge nu leh pate chuan chutiang zirtîrna chu an ṭan ang? Mi tam takin ṭûl an tih hun aia hmaah an ṭan tûr a ni. Hmeichhe naupang chuan kum 10 emaw, a aia hma emawah thi a nei ṭan mai thei a. Mipa naupang chuan mut hlâna thil chhuak chu kum 11 emaw, 12-ah emaw a nei ṭan mai thei bawk. Naupangte tân an nun thlâk danglamtu hêng thil thlengte hi hriat thiam loh chuan nasa taka manganna thlen thei thil a ni a. Chûng chu thil pângngai tak a nihzia hriattîr lâwk an ngai a ni. Chu mi hun chu, sex-education program tam takin an zirtîr loh nungchang lama Bible tehnate zawm a hlutzia leh pawimawhzia hre thiam tûra ṭanpui hun a ni bawk.—Thufingte 6:27-35. (w11-E 11/01)

[Footnote]