5 Pathianin Tih Tak Zeta Biakna Tawh Phawt Chu A Pawm Vek—Hei Hi A Dik Em?

I lo hriat tawh mai theih chu: “Kawng chi hrang hrang hmanga hmun pakhat kan pan theih angin, Pathian pan theihna kawng tam tak a awm a. Mahni tâna Pathian pan theihna kawng kan zawn ṭheuh a ngai a ni mai.”

Bible zirtîrna chu: Pathian chu tihderna leh vervêkna tel lovin, tih tak zetin kan be tûr a ni. Isua chuan a hun laia sakhaw hruaitute Pathianin a hnâwl chhan chu heti hian a sawi a ni: “Isaia hian nangni mi vervêkte thu hi a lo hril lâwk dik zet mai. ‘He miteho hian an kain mi chawimawi a, an thinlung erawh chuan mi hlat si a,’” tiin. (Marka 7:6) Chuti chung pawhin, tih tak zetna ringawt chu Pathian pawm hlawhna a ni lo.

Isua chuan sakhaw hruaitute leh an hnungzuitute Pathian biaknaa thil dik lo awm chu târ langin, tih tak zetna mai a tâwk lohzia chiang takin a târ lang a. Pathian thu: “Engpawh ni sela, an zirtîrnaa mihring thupêkte an zirtîr avângin an mi biak ṭhin hi athlâwn mai a ni,” tih chu an chungah a hmang a ni. (Marka 7:7) Pathian thil phûtte aia an sakhaw thurochhiahte an dah pawimawh zâwk avângin, an Pathian biakna chu “athlâwn,” a nih loh leh a ṭangkai lo.

Pathian pan theihna pawm tlâk kawng tam tak a awm tih ngaih dân pawm ai chuan, Bible chuan kawng pakhat chauh a awm tih a zirtîr zâwk a. Matthaia 7:13, 14 chuan: “Kawngka zîmah chuan lût rawh u; boralnaa kalna kawngka chu a zau va, a kawng pawh a zau bawk a, chu mi lama lût chu tam pawh an tam hle a ni; nunnaa kalna kawngka chu a zîm a, a kawng pawh a chêp bawk a, a hmutute pawh tlêmtê an ni,” a ti a ni.

Thutak hriatnain a ṭanpui dân che: Kawng thui tak intlânsiaknaa tel tûrin thla tam tak chhûng i lo inbuatsaih a, intlânsiaknaah chuan i chak ta ber a; mahse, i hriat miah lohvin dân pakhat i bawhchhia a, chu mi avânga lâwmman hmu thei ta lo angah han inchan chhin teh. I ṭan lâkna zawng zawng thlâwn ta vek nia inhriatna i nei ngei ang. Pathian kan biakna kawngah hetiang thil hi a thleng ve thei ang em?

Pathian kan biakna chu intlânsiakna nêna khaikhinin, tirhkoh Paula chuan heti hian a ziak a ni: “Intihsiaknaahte pawh chuan miin bei mah sela, dân angin a beih loh chuan khumtîrin a awm ngai lo,” tiin. (2 Timothea 2:5) Pathian duhsakna chu ‘dân anga’ amah kan biak chauhvin kan dawng thei ang, chu chu ama duhzâwng mila kan biak chauhvin tihna a ni. Intlânsiaknaa tel chuan a duhna kawng apiang zawha a tlân hnuah lâwmman hmuh a inbeisei thei lo; chutiang bawkin, Pathian panna kawng chu keimahni thlan theih a ni lo.

Pathian tilâwm tûr chuan, amah kan biaknaah a chungchânga dâwt thute a tel tûr a ni lo. Isua chuan: “Pathian chibai bûktu tak takten thlarau leh thutakin Pa chibai an bûk tawh ang,” a ti a. (Johana 4:23, C.L. Re-edited) Pathian panna kawng dik chu a Thu, Bible aṭangin kan hre thei a ni.—Johana 17:17.a (w11-E 10/01)

[Footnote]

[Phêk 8-naa thu lâk chhuah]

Sakhua zawng zawng chuan mite chu a pawm tlâka Pathian be tûrin a zirtîr em?