Hun Ṭha Zawk A Lo Thleng Thuai Dawn!

“Rei lo tê achinah mi suaksual chu a awm tawh dâwn si lo . . . Thuhnuairawlhte erawh chuan ram hi an luah ang a: remna chênin an hmuingîl ang.” —SAM 37:10, 11.

HE HRILH lâwkna thlen famkimna hi hmuh i châk em? I châk ngei ang. A rawn thleng famkim thuai dâwn tih rinna tûr chhan ṭha tak kan nei a ni.

Thuziak hmasate khân ‘ni hnuhnûnga’ kan awm tawhzia chiang taka târ langtu Bible hrilh lâwkna ṭhenkhat chauh a târ lang a. (2 Timothea 3:1-5) Chûng thilte chu beiseina kan neih theih nâna sawi lâwk tûrin Pathian chuan Bible ziaktute a thâwk khum a ni. (Rom 15:4) Chûng hrilh lâwknate thlen famkimna chuan tûna buaina kan tawh mêkte a tâwp thuai dâwn tih a târ lang.

Ni hnuhnûng tâwpah eng nge lo thleng ang? Mihringte chunga Pathian Ram rorêlna a lo thleng ang. (Matthaia 6:9, 10) Chutih huna he lei dinhmun tûr Bible sawite hi lo ngaihtuah teh:

● Ṭâm a awm tawh lo vang. “Leiah, tlâng chungahte hian, buh tam tak a awm ang a; a vui chu Lebanon angin a nghîng suau suau ang.”—Sâm 72:16.

● Natna a awm tawh lo vang. “Chu mi khuaa awm chuan ‘Ka dam lo ve,’ a ti lo vang.”—Isaia 33:24.

● Lei hi siam thar leh a ni ang. “Thlalêr leh ram pilril chu a lâwm ang a; ram ro chu a hlimin phûl pangpâr angin a pâr ang.”—Isaia 35:1.

Hêng hi lo thleng thuai tûr Bible hrilh lâwkna mi tichak thei takte zînga ṭhenkhat chauh a ni. Engvângin nge Jehova Thuhretute chu hun ṭha zâwk lo thleng thuai tûra an rin tlat chhan i zawh loh vang? (w11-E 05/01)