Hrilh Lâwkna 2. Ṭam Tla

“Ṭâmte a tla ang.”—MARKA 13:8.

● Pa pakhat chuan Niger rama Quaratadji khuaah inhumhimna a zawng a. A unaute leh cousin-te pawhin ṭâm an rawn tlânsan bawk a ni. Mahse, chu pa chu chhuatah amah chauhvin a mu a ni. Engvângin nge? Chu khaw lal, Sidi-a chuan: “[A chhûngte] a châwm zo si lo va, an rilṭâm hmêl hmuh chu harsa a ti êm a ni,” tiin a chhan a sawi.

THU DIK CHUAN ENG NGE A TAR LAN? Khawvêl puma mi 7 zêla 1 deuh thaw chuan nî tin ei khawp an nei lo. Africa khawmuala Sahara thlalêr chhim lam ramahte chuan dinhmun chu a chhe lehzual a, mi 3 zêla 1 chu rilṭâmin an awm deuh reng a ni. A nih dân dik tak hriatthiam nân, naupang pakhat nei chhûngkua hi han ngaihtuah teh. Anni chuan mi pahnih ei khawp chauh nei ta se, an fa an eitîr hnuah tuin nge nghei ta ang? Pa ber nge ni ang a, nu berin? Chutiang chhûngkuate tân hetiang thu tlûkna hi nî tin siam a ngai a ni.

HNIAL KALHNA TLANGPUI CHU EN NGE NI? Kan leilung hian mi tin kham khawp aia tam chaw a thar chhuak reng a. Leilung hausaknate hi rual khai zâwka hman a ngai mai a ni.

CHU HNIALKALHNA CHU A PAWM TLAK EM? Lo leitute chuan tûn hma zawng aiin an thar chhuak hnemin, an thawn chhuak tam zâwk ngei mai. Dinhmun duhthusâm hnuaiah chuan mihring sawrkârte hian leilung ata ṭâm paih bo tûrin a thlai tharte rual khai takin an hmang thei tûr zawng a ni ngei mai. Mahse, kum sâwm têl an lo tum chhin tawh hnuah pawh an hlawhtling thei chuang lo.

ENG NGE I NGAIH DAN? Marka 13:8 thu hi a thleng famkim em? Khâwl lam thiamna a sâng hle tawh chung pawhin, khawvêl puma mite chu an la ṭâm reng tho vem?

Lîrnghîng leh ṭâm chu ni hnuhnûng chhinchhiahna dang aṭanga lo chhuak buainate’n a zui châwk ṭhîn. (w11-E 05/01)

[Phêk 5-naa thu lâk chhuah]

“Khawsik âwmnâ, kaw ṭha lo, leh natna dang avânga thi naupang pathum zînga pakhat zêl chu ṭâm lo ta se chuan an dam chhuak ang.”—ANN M. VENEMAN, UN CHILDREN’S FUND EXECUTIVE DIRECTOR HLUI.

[Phêk 5-naa Milem Hawhtîrtu]

© Paul Lowe/Panos Pictures