“Tâwpna” Chu Eng Nge Ni?

“. . . chu mi zawhah chuan tâwpna chu a lo thleng ang.”—MATTHAIA 24:14.

TUN hnai hian khawvêl tâwpna chungchâng hian sawi a hlawh hle a. Lehkhabu te, film te, leh naupang comic bu aṭanga science lam thilte chhuahna magazine-te hian chungpikna lo thleng tûr râpthlâk tak takte chu an entîr a. Chûngah chuan nuclear indona te, arsi thlâwkin lei a rawn den te, hri hlauhawm tak te, sik leh sa thunun theih loh te, a nih loh leh khawvêl pâwna mite rawn beihna avâng tea leilung tihchhiatna a tel a ni.

Sakhaw lam aṭang pawhin thlîr dân chi hrang hrang a awm a; tam tak chuan “tâwpna” chuan leia nun zawng zawng a titâwp vek tûr niin an zirtîr a ni. Matthaia 24:14 thu chungchângah theologian pakhat chuan: “He Bible châng hi Pathian Thute zînga pawimawh ber pakhat a ni a . . . Kan zînga tam takin kan mitthla ngai meuh loh chutiang chhiatna râpawm tak, tihchimihna chu kan tûn lai chhuan hian a tâwk thei reng a ni,” tiin a hlauhawm dân a ziak a ni.

Chutiang thlîr dân chuan he thu pawimawh tak: Pathian Jehova’n lei lung hi “a tinghet a,” chu chu “engmah lovah a siam lo va, mihring awm nân a din zâwk a ni,” tih chu an hmaih fo a ni. (Isaia 45:18) Chuvângin, Isua’n “tâwpna” a sawi hian leilung hi tihchhiat a ni ang a tihna a ni lo va; mihring zawng zawngte tihchimih an ni ang a tihna lah a ni hek lo. A sawi awmzia chu, mi suaksualte—luhlul taka Pathian Jehova kaihhruaina duhawm tak mila nung duh lote—chu tihboral an ni dâwn a tihna a ni.

Entîrna pakhat han ngaihtuah teh. In mawi tak i nei a, chu chu mi athlâwnin i luahtîr a ni. In luahtute zînga ṭhenkhat chuan inrem taka khawsain, i in chu duat takin an enkawl a. Mahse, mi dangte chuan buainate siamin, an insual bur bur reng a, i in luahtu ṭhate pawh an tihrehawm a ni. Tin, i in chu an tichhiain, ti tawh lo tûra i hrilh chu luhlul takin an âwih duh lo a ni.

Chu mi dinhmun siam ṭha tûrin eng nge i tih ang? I in chu i tichhe mai dâwn em ni ang? A beisei awm lo hle. In luahtu ṭha lote chu hnawt chhuakin, i in chhia chu i siam ṭha zâwk ngei ang.

Jehova chuan chutiang deuh bawkin thil a ti ang. Ani chuan fakna hla phuahtu chu hetianga ziak tûr hian a thâwk khum a: “Thil ṭha lo titute chu tihboralin an awm dâwn si a: LALPA nghâktute erawh chuan ram hi an luah ang. Rei lo tê achinah mi suaksual chu a awm tawh dâwn si lo: a ni, a awmna hmun chu en en mah la, a awm tawh lo vang. Thuhnuairawlhte erawh chuan ram hi an luah ang a: remna chênin an hmuingîl ang,” tiin.—Sâm 37:9-11.

Tirhkoh Petera pawhin chu mi thu bawk chu a sawi a. Pathian thlarauva thâwk khuma awmin, ani chuan: “Pathian thuin hmân laiin vânte a lo awm a, lei pawh tui ata leh tui zîngah awm khâwmin a lo awm a; chûngah chuan chu mi laia khawvêl awm chu tuiin a chîm a, a boral ta,” tiin a ziak a ni. (2 Petera 3:5, 6) Hetah hian tirhkohvin a sawi chu Nova Tuilêt chungchâng hi a ni a. Pathian ngaihsak lo mite chu tihboral an ni a, a leilung tak erawh tihchhiat a ni ve lo. Khawvêl pum huap chu Tuilêt chu ‘Pathian ngaihsak lo, la awm tûrte entîrna’ a ni.—2 Petera 2:6.

Petera chuan heti hian a sawi zawm a ni: “Tûnah vânte leh lei awmte hi chu mi thu avâng vêk chuan Pathian ngaihsak lo mite rorêl leh boral nî atana dahin hâl tûra khêk a ni,” tiin. Hetah hian “Pathian ngaihsak lo mite rorêl leh boral nî” chungchâng kan hmu a. Chuvângin tihboral tûr chu a leilung ni lovin, Pathian ngaisak lo mite an ni tih hria ang che. Chu chu engin nge zui? Petera chuan: “A thutiam ang chuan vân tharte [Pathian Messia Lalram] leh lei thar [mi fel awmhote], a chhûnga felna awmte chu kan beisei a ni,” tiin a ziak a ni.—2 Petera 3:7, 13.

Bible hrilh lâwkna chuan “tâwpna” lo thlen hun a hnai tawh tih a târ lang bawk a. Chu mi dikzia târ langtu thilte hriat nân, Matthaia 24:3-14 leh 2 Timothea 3:1-5 chu chhiar ang che.a

Naupang tân pawha hriat thiam theih tûr Matthaia 24:14 chungchânga ngaih dân a tam lutuk hi mak i ti em? A chhan a awm a ni. Mite’n Pathian Thu, Bible-a thutak an hriat loh nân Setana chuan an mit a tihdelsak a ni. (2 Korinth 4:4) Tin, Pathianin a thiltumte chu mi chapote lakah thup bovin, mi inngaitlâwmte hnênah a puang bawk a. He mi chungchângah hian Isua chuan: “Aw ka pa, lei leh vân Lalpa, nangin mi fing leh mi bengvârte hnênah hêng thu hi i zêp a, nausênte hnênah i puan avâng hian ka fak a che,” a ti. (Matthaia 11:25) Pathian Ram awmzia hre chiangtu mi inngaitlâwmte zînga tel leh a thlâwptu zawng zawngte hnêna a rawn thlen tûr malsâwmna beisei theia kan awm chu chawimawina a va ni tak êm! (w11-E 03/01)

[Footnote]

[Phêk 9-naa milem]

Lalram chuan leia suahsualna zawng zawng “tâwpna” a thlen ang