Engvângin Nge Nupa Inṭhenna A Tam Em Em?

“Pharisaite [Isua] hnênah an lo kal a, amah fiah nân, ‘Eng vâng pawhin miin a nupui mâk a thiang em?’ an ti a.”—Matthaia 19:3.

ISUA hun laia mi ṭhenkhat chuan inneih ngheh theih emaw, nghet tûr a nih emaw chungchângah zawhna an siam a. Isua chuan: “Atîr ata an siamtu khân hmeichhia leh mipaa a siam leh, ‘He mi avâng hian mipain a nu leh a pa a kalsan ang a, a nupui a vuan ang; tichuan an pahnih chuan tisa pum khat an lo ni tawh ang,’ a ti tih in chhiar lo vem ni? Chutichuan pahnih an ni tawh lo va, tisa pum khat an ni tawh zâwk a ni. Chuvângin Pathianin a zawm tawh chu mihringin ṭhen suh se,” tiin anni chu a chhâng a ni.a (Matthaia 19:4-6) Pathianin inneihna nghet awmtîr a tum a ni tih a chiang hle.

Tûn lai ram tam takah hian, nupa zaa 40 emaw, a aia tam emaw chu an ‘inṭhen’ leh a ni. Inneihna chungchânga Bible thurâwn chu a hman tlâk tawh miah lo tihna em ni? Inṭhenna a tam chhan chu inneih ruahmanna hrim hrimah hian dik lohna a awm vâng a ni thei ang em?

He entîrna hi han ngaihtuah teh: Nupa tuak hnih chuan motor inang an lei a. Tuak khat chuan ṭha taka enkawlin, fîmkhur takin an khalh ṭhîn a. Chuvângin, an motor chu a chhe lo. Tuak dang chuan an motor enkawl nân hun leh tha an sêng lo va, an khalh fîmkhur lo hle bawk. Chu motor chu a lo chhia a, an hluihlâwn ta a ni. Motor chhiat chhan chu engvâng nge? A motor zir loh vâng nge ni a, a neitu zir loh? A neitu zir loh a ni tih a chiang hle.

Chutiang bawkin, inneihna tam tak a hlawhchham chhan pawh inneih ruahmanna dik loh vâng a ni lo. Inneihna hlawhtling tam takte chuan chutiang a nihzia a finfiah a ni. Chutiang inneihna hlawhtling chuan mi malahte, chhûngkuaahte, leh vêngchhûngahte hlimna leh ngelnghehna a awmtîr a ni. Mahse, inneihna nghet tûr chuan motor ang bawka ṭha taka enkawl leh ngaihsak reng a ngai a ni.

In inneihna chu a rei tawh hle emaw, a la rei lo hle emaw pawh ni se, inneihna enkawl dân tûr leh tihngheh dân tûr chungchânga Bible thurâwn nunpui chu a sâwt hle a ni. A dawtah hian entîrna ṭhenkhat kan hmu ang. (w11-E 02/01)

[Footnote]