Thurûk 2

Mi Dangte Nêna Inkhaikhin Duhna Do Rawh

BIBLE-IN ENG NGE A ZIRTIR? “Mi tupawhin a hnathawh fiah rawh se. Tichuan mi dang nêna inkhaikhin lovin ama chungchâng chauh a chhuang thei ang.”—Galatia 6:4, Baptist Mid-Mission’ Translation.

ENG NGE A HARSATNA? Mi dangte nêna inkhaikhin duhna kan nei ṭhîn a—a châng chuan mahni aia nei lo zâwkte nên ni mah se, a tam zâwkah chuan mahni aia chak zâwk te, hausa zâwk te, a nih loh leh talent nei ṭha zâwkte nên kan inkhaikhin tlângpui ṭhîn. Tute nên pawh inkhaikhin ila, chu chuan rah ṭha a chhuah lo. Mihring hlutna chu a thil neih emaw, a thil tihtheih emaw hmanga teh niin kan ngai sual palh ṭhîn a. Thîkna leh inelna rilru put hmang kan neih phah thei bawk.—Thuhriltu 4:4.

ENG NGE I TIH THEIH? Pathian en dân anga mahni inen chu tum rawh. Mahni i inhlutna chu Pathian thlîr dân che thununtîr rawh. “Mihring chuan pawn lama lan dân an en ṭhîn a, LALPAa erawh chuan thinlung lam a en zâwk ṭhîn.” (1 Samuela 16:7) Pathian Jehova chuan i hlutna chu mi dangte nêna khaikhin lovin, i thinlung te, ngaihtuahna te, rilru veizâwng te, leh i thiltumte endikin a teh zâwk a. (Hebrai 4:12, 13) Jehova chuan i tlin tâwk chu a hria a, nang pawhin i hriat ve a duh a ni. Mi dangte nêna inkhaikhina i hlutna i teh chuan, mi chapo tak emaw, lungawina nei ngai lo emawah i chhuak mai ang. Chuvângin, engkimah a ber i hauh dâwn lo tih pawm thiam ang che.—Thufingte 11:2.

Pathian mithmuha hlutna nei tûr chuan eng thil chiah nge i tih ngai? Ani chuan zâwlnei Mika chu hetianga ziak tûr hian a thâwk khum a ni: “Aw mihring, ṭha chu a entîr tawh che a ni; LALPAN a phût che chu eng nge ni? Dik taka tih leh khawngaihna ngainat leh i Pathian nêna thuhnuairawlh taka lên dun a ni lo vem ni?” tiin. (Mika 6:8) Chu thurâwn chu i zawm chuan Pathianin a ngaihsak ang che. (1 Petera 5:6, 7) Chu lo liama lungawina tûr chhan ṭha zâwk eng nge awm? (w10-E 11/01)

[Footnote]

[Phêk 5-naa milem]

Pathian Jehova chuan kan hlutna chu kan thinlunga thil awm ṭanchhanin a teh